Allt er vænt sem vel er grænt

2004-06-29T14:43:00.000Z

Inn´ég sit og skrifa

...langar að hoppa upp og hlaupa út en má það ekki. Málið er að í stað þess að spranga um götur og sundlaugar bæjarins eins og heiðvirtum kennara sæmir á sumrin, sit ég hér enn inni á kennarastofunni og hamra lyklaborðið. Ég hef ekki samvisku í annað, eigandi eftir MPA-ritgerð á sama tíma og Kjartan Sveinn er á leikskólanum og Guðrún Birna situr sveitt og fæst við dóna og rudda sem kría út afslátt á 500.- króna auglýsingar.

Ég næ samt yfirleitt að slá á samviskuna um kl. 15:00. Þá fer ég að dunda mér, sæki KS og GB og við tekur hinn hefðbundni og rútineraði fjölskyldupakki. Ég ætla sko ekki að láta tölvuna verða mitt síðasta. Geðheilsan er mér og mínum nánustu meira virði.

2004-05-27T15:29:00.000Z

Húsfundur!

Gjaldkerinn ætlaði að missa sig við mig þegar ég talaði um að setja niður stjúpur í gærkvöldi í sumarblíðunni sem þá var. Ekki nóg með að þær myndi bæði frjósa og fjúka innan sólahrings heldur datt undirrituðum að setja nokkur blóm í 2 potta sem eru 2 metra inn á hinum helmingnum af blokkinni. Gjaldkerinn vill s.s. að hinn stigagangurinn borgi þau blóm (c.a. 80 kr.)

Allt ætlaði aftur um koll að keyra við rafmagnstöfluna þegar einn af íbúunum var að lýsa því að hann vildi losna við loftnets-magnara-öryggið úr sinni töflu og færa það yfir á sameignar-rafmagnið. Af óskiljanlegum ástæðum ákvað gjaldkerinn að viðkomandi hefði ,,stolið" örygginu til sín, í eigin töflu (andstætt hagsmunum töflueigendans). Þó vildi gjaldkerinn ekki láta færa öryggið yfir í sameignina. Enginn skildi neitt í neinu en voru samt alveg til í að öskra á hvern annan.

Þá var það ákveðið að karlarnir skildu sópa stéttarnar enda væri það ekki kvenmannsverk að mati eldri kvennanna í blokkinni.

Að lokum kom í ljós að allt ,,draslið" sem átti að fjarlægja tilheyrði aðeins einum manni, þ.e. manninum sem alltaf er vínlykt af. Hann hafði líka góðan húmor fyrir að sjá um að gefa blómunum að ,,drekka"

2004-05-04T10:18:00.000Z

Samræmda nammihátíðin!

Ég sat yfir í fyrsta samræmdaprófinu hjá 10. bekk í dag. Þvílíkt úrval og magn af sælgæti og gosi hef ég aldrei séð í einni skólastofu. Ég held að þetta sé samræmd nammihátið í öllum grunnskólum landins og prófið er afsökun fyrir að mega koma með nammið í skólann. Maður var með sleftaumana á meðan maður gekk á milli nemenda.

2003-11-06T09:19:00.000Z

MA-ball

Sá þetta á síðunni hennar Ásu hans Sigga og rann blóð til skyldunnar:

MA-ingar

Allir MA-ingar fyrr og síðar eru hvattir til að mæta á Gaukinn föstudaginn 8. nóv því þá er ég búin að bóka efri hæðina undir okkur!
Allir sem mæta fyrir kl.23 fá frítt á ballið um nóttina þar sem hljómsveitin Írafár tætir og tryllir...

Eftirfarandi tilboð verða á barnum frá kl. 20-24:

Stór bjór 350kr
Lítill bjór 250kr
Skot 300kr
Einfaldur 500kr
Tvöfaldur 800kr

**** Endilega látið þetta berast til ALLRA MA-inga... ****

Kveðja, Ilmur Dögg (Dóttir Níelsar, stærðfræðikennara)

2003-10-22T13:10:00.000Z

Unglingar

Gefið ykkur smá tíma og spáið í það hvernig það er að vera unglingur. Stillið ykkur inn á 8.-10. bekk. Prófið svo að hugsa ykkur að þið séuð að kenna 28 stykkjum í einni lítilli stofu.

Þögnin er ekkert að æra mann í þessu starfi... Blessuð börnin að vera á þessum aldri.

2003-10-22T13:04:00.000Z

Nýtt heimili!

Ef að líkum lætur verðum við fjölskyldan flutt í vestubæ Kópavogs snemma á næsta ári. Búin að finna íbúð og nú er bara að drífa sig í greiðslumat.

2003-09-08T14:44:00.000Z

Nýtt netfang hjá Gumma!

Ég reikna með að nota þetta gudmundur@snsk.kopavogur.is í vetur í staðin fyrir HÍ netfangið.

2003-09-07T21:04:00.000Z

OleOleOleOleeeee

Þjóðverjarnir voru heppnir að sleppa með jafntefli í gær. Ísland á EM... :-)

2003-08-29T14:34:00.000Z

Hvað hef ég gert..

..til að verðskulda slík örlög að kenna kynfræðslu í 9. bekk? Annað hvort hef ég verið svo sómakær í gegnum lífið að mér er treyst fyrir þessu mikilvæga verkefni eða svo ósæmilegur að mér hefnist nú loks. Þetta er a.m.k. ekkert sem ég tel mig sérfræðing í og ég væri því alveg til í að rífa þessa blaðsíðu úr örlagabókinni. Námsskrá 9. bekkjar í lífsleikni gerir s.s. ráð fyrir kynfræðslu. Helsta markmið hennar er að koma í veg fyrir ótímabæra þungun. Ég verð því að mæta í öll bekkjarpartýin í vetur og dreifa tilheyrandi áróðri yfir börnin mín. "No sex in the house, please!."

2003-08-22T12:55:00.000Z

Fyrsti kennslutíminn

Ég hitti umsjónarbekkinn minn 9.G í fyrsta skiptið áðan. Þetta eru hressir krakkar og ég vona að við eigum góðan vetur fyrir höndum. Merkilegt nokk þá voru þau ekki eins bólugrafin og mig minnir að ég hafi verið á þessum aldri. Hví fær þessi kynslóð ekki að þjást vegna fílapennsla og graftarbólna eins og mín fékk að gera? Óréttlæti heimsins tegir sig víða.

2003-08-13T14:17:00.000Z

Smáborgarabragur á fréttastofunum

Nú eru þrjú kvöld síðan fréttamenn Stöðvar 2 sýndu fréttina um laxveiðiferð fjármálaráðherra sem var í boði Kaupþings-Búnaðarbanka. Það munaði reyndar minnstu að fréttin kæmist EKKI í loftið því einn af aðaleigendum stöðvarinnar vildi ekki að almenningur fengi að sjá hvernig íslenskt velvildar og fyrirgreiðslusamfélag virkar í hnotskurn. Eftir viku tókst fréttamönnunum þó að telja nægjanlegan kjark í sig til að setja fréttina í loftið.

Í allri gúrkutíðinni sköpuðu fréttaþyrstir hassarfréttamenn sér nýtt umfjöllnarefni um ritfrelsi fréttamanna og höfðu þannig ofanaf fyrir sjálfum sér í næstu fréttatímum. Að lokum var Davíð Oddsson orðinn svo pirraður á umfjölluninni að hann pantaði frétt um Magnús Þór Hafsteinsson, verðandi þingmann Frjálslyndaflokksins. Magnús er á leiðinni í grjótið fyrir að koma þorskum undan kvóta. En ekki hvað? Maðurinn er einn helsti talsmaður þeirra sem vilja afnema kvótakerfið. Davíð fékk viðtal við sig fyrir framan ráðherrabústaðinn í gær þar sem hann sagði að Magnús ætti ekki að taka þingsæti eftir að hafa afplánað dóminn. Davíð var ekki að skafa af biturð sinni út í Geirsmálið, því hann sagði að sjálfstæðismaður fengi aldrei að taka þingsæti undir slíkum aðstæðum.

Þess má geta að forsetisráðuneytið neitar að gefa nokkrar upplýsingar um boðsferðir Davíðs í sumar. Ætli þessir stórlaxar séu ekki allir að grilla lax upp í Kjós núna meðan þeir ákveða hvernig skipta eigi arðinum af vinnu landsmanna?

2003-08-11T12:41:00.000Z

Halló Hafnó!

Hvernig ætli það sé að búa í Hafnafirði? Ég sá íbúð til sölu í Hafnarfirði sem ég væri til í að skoða nánar. Við GB ætlum að renna í hádeginu og kíkja á húsið að utan og fá okkur hafnfirska pilsu í sjoppu.

2003-08-07T22:27:00.000Z

Niður með Bandaríkin

Spáið í það að Bandaríkjamönnum skuli láta sér detta í hug að beita Íslendingum viðskiptaþvingunum ef við hefjum hvalveiðar. Þar með værum við komin í hóp með Kúbu og Írak. Það er þá ekki í fyrsta sinn sem Bandaríkjamenn skipta sér að innanríkismálum annarra ríkja. Núna út af hvölum. Þvílíkir super-egoistar og hræsnarar. Frjáls viðskipti minn rass.

Talandi um að veiða hval. Ég er síður en svo viss um að það borgi sig að hefja hvalveiðar. Mér heyrast rök þessara veiða aðalega byggjast á einhverjum þjóðrembing sem ég gef nú ekki mikið fyrir. Ég met raunsæi og hlutlaust mat mun meira. Hvort við veiðum hval eða ekki er þó algjörlega okkar mál og ríkisstjórnum annarra landa kemur það ekkert við, svo lengi sem ekki er verið að veiða úr stofnum í útrýmingarhættu.

2003-08-07T22:16:00.000Z

Aumingja Árni

Bréfið sem Árni Jonsen sendi á Þjóðhátið í Vestmannaeyjum sýndi, svo ekki verður um villst, að maðurinn er gjörsamlega búinn að tapa sjálfsvirðingunni. Það er sorglegt hvað menn geta orðið skemmdir. Karlinn þarf að fara á strangt sjálfstyrkinganámskeið ætli hann að halda áfram að koma fram á opinberum vettvangi án þess að verða sér til enn frekari skammar.

2003-07-28T14:21:00.000Z

Fín helgi

Á föstudagskvöldið fórum við Huginn Freyr Þorsteinsson, einn mesti kommúnisti sem ég þekki, á pöbbarölt. Á vegi okkar urðu margir skrýtnir og skemmtilegir menn, m.a. Sigfús Ólafsson, trommari í Tveimur dónalegum haustum, Villi naglbítur og Sýrnir listamaður. Við fórum um víðan völl og tókum púlsinn á mannlífinu. Gaman það.

Á laugardeginum flúði svo Guðrún Birna upp í bústað með stelpunum og við feðgar notuðum tækifærið og skoðuðum flugsýningu með Sverri. Síðan komu Anna og Jens í heimsókn og Atli og Sverrir litur um kvöldið í kaffi og með því. Á sunnudeginum gaf svo fjölskyldan öndunum brauð en Kjartan Sveinn er farinn að segja afar dimmraddað og drungalega ,,Braaaa" í hvert skipti sem hann sér fugl.

Í gærkvöldi horfðum við Sverrir svo á Jackass. Þvílíkir rugludallar. Það komu þær stundir sem mér varð óglatt og ég gatt ekki horft, t.d. þegar þeir voru að skera sig á pappír milli tánna, fingranna og í varirnar. Það er sko ekkert grín að vera þeir.

2003-07-24T13:17:00.000Z

Af jafnréttisstýru sem braut jafnréttislög

Það er í senn fyndið og grátlegt að fylgjast með máli Valgerðar Bjarnadóttur. Er hægt að gera meira á sig en hún gerði? Jafnréttisstýra sem brýtur jafnréttislög.

Síðan heyrist náttúrlega ekkert í kvennfrelsishreyfingum landsins út af málinu. Ef karlmaður hefði staðið í hennar sporum væri sennilega búið að kjöldraga hann með allri strandlengju landsins af feministafélaginu. EEEEEEENNNN Valgerður elskan, hún verður ekkert kjöldregin. Því fyrir utan það eitt að vera kona, þá er hún líka ein af försprökkum kvennahreyfingar fyrri tíma og hún á því vinkonur á báðum stöðum sem bíða hennar í röðum.

Það er líka ágætt að vinkonur hennar hafi vit á að þegja. Sá sem hreyfir litlafingur til að verja hana er náttúrlega bara að segja að jafnréttislögin eigi ekki rétt á sér.

Því miður fyrir Valgerði hafði hún sjálf ekki vit á að þegja í þessu máli eða reyna að klára það með einhverri reisn. Eftir að hún var farin frá sem jafnréttisstýra, þurfti hún að koma fram í sjónvarpinu og lýsa því yfir að hún hefði viljað halda áfram sem jafnréttisstýra. Hún var samt tilbúin að fara fyrst að félagsmálaráðherra sagði henni að gera það. (Aumingja Valgerður lét sér detta í hug að hún gæti leyst málið með því að víkja sem formaður leikhúsráðs LA.)

ATH:
OK, smá útskýring á pirringnum. Yfirleitt er ég nú jákvæður út í baráttu kvenna en akkúrat núna er ég bara svo pirraður. Ég var að koma af kaffistofunni í Odda þar sem ein feministakonan var að segja að rannsóknir sýndu að það væri ekki viðurkennt að konur þyrftu að vera frá vinnu vegna veikinda, jafnt og karlar. Hvaða rugl er að, segi ég nú bara? Þetta er bara orðið ofstæki og ekkert annað. Maður sér náttúrlega bara það sem maður vill sjá.. (rannsakendur líka).

Í sama samhengi var athyglisvert að sjá góða vinkonu mína úr MA, hana Steinu, í Ísland í bítið í dag. Ég náði bara lokunum á umræðunni en þar sagði hún að henni þætti tvíburabróðir sinn oftar verða fyrir barðinu á kynjamisrétti en hún.

Ég held því að við verðum að fara aðeins að komast niðrá jörðina í þessari kynjumræðu, slaka á og njóta þess sem lífið hefur upp á að bjóða, jafnt konur sem karlar.

2003-07-24T11:25:00.000Z

Sumarið er tíminn...

..sem Gummi hélt upp á 5 ára stúdentsafmæli frá MA.
..sem Gummi leitar að vinnu í 5 vikur.
..sem Gummi þarf oft að snýta sér út af grasofnæmi.
..sem Gummi situr inni í Odda og gerir verkefni sem hann átti að skila fyrir hálfu ári síðan.
..sem Kjartan Sveinn byrjaði að labba.
..sem Guðrún Birna vinnur fyrir heimilinu.
..sem Gummi fer inn á bloggið sitt í fyrsta sinn síðan 12. maí.
..sem Gummi býður spenntur eftir að fá laun í stað bóta, þann 1. ágúst.
..sem Gummi býður spenntur eftir að fara kenna bókina, Sjálfstæði Íslendinga.

2003-05-12T11:17:00.000Z

Fjör í X-B

Framsókn kom vel út úr kosningunum. Við framsóknarmenn erum mjög ánægðir með útkomuna og þökkum öllum þeim sem tóku þátt í kosningabaráttunni og þeim sem studdu okkur í kosningunum. Persónulega vil ég þakka Guðrúnu Birnu minni og Kjartani Sveini fyrir þolinmæðina á meðan á baráttunni stóð. Kosningabaráttan var skemmtilegur og gefandi tími sem ég hefði ekki viljað missa af. Það er mikið fjör í Framsókn og gaman að vera ungur miðjumaður í borginni. Ég tel að framtíð okkar sé björt ;-)

2003-04-21T10:25:00.000Z

Morgunstund gefur gull í mund

..eða munn eins og sumir segja ;-) Á heimilinu er æðstráðandi Kjartan Sveinn sonur minn. Hann heldur uppi herhaga þrátt fyrir ungan aldur. Í morgun, annan í páskum, vorum við feðgar mættir á þvottaplan kl. 8:30 að þrífa bílinn en síðan drifum við okkur niður á andapoll að elta gæsirnar. Kjartan Sveinn reyndi að grípa í eina þeirra og hún varð svo hrædd að hún sendi okkur einn grænan og illa lyktandi á gangstéttina.
Á pollinum voru fullt af Hjöltum og Marinóum en við fjölskyldan köllum allar endur ýmist Hjalta eða Marinó. Þeir félagar gáfu nefnilaga Kjartani Sveini sitthvora öndina í baðið og þær voru strax skírðar í höfuðin á þeim.
Það var greinilegt að fáir vöknuðu jafn spenntir og við feðgar yfir Hjöltunum og Marinóunum á tjörninni í morgun. Borgin bókstaflega stein svaf. Ekki hræða á ferðinni og þeir spökustu í bænum, fyrir utan okkur feðga, voru 3 hrafnar sem þinguðu á ljósastaur. Við Kjartan Sveinn þökkum Guði fyrir anna í páskum.

2003-04-01T00:26:00.000Z

Hahahaha

Guðrún Birna var alveg brjáluð áðan vegna þess að færslurnar hennar birtust ekki á bloggsíðunni hennar. Núna sé ég að hún hefur verið að blogga á blogginu mínu án þess að fatta það. Síðustu 2 færslur eru hennar. Ég ætla ekki að stroka þær út. Núna er hún steinsofandi og ég get ekki sett þetta inn á hennar síðu því ég veit ekki passwordið hennar. Ég spái því að hún sé með bloggmartröð núna þar sem færslurnar hennar birtast aldrei, sama hvað hún bloggar mikið...ég ætti kannski að vekja hana...

2003-03-31T22:46:00.000Z

Greinilegt að ég þekki Gumma minn ekki eins vel og ég hélt
Það eiga fleiri í stríði við súkkulaðifíknina. Meira að segja siðprúðir framsóknarmenn í framboði eiga sín litlu leyndarmál. I did not know this. Spurning um að stofna samtök?

2003-03-31T22:43:00.000Z

Fúli Philly
Ég hef sagt það áður og segi það aftur Philly er drepleiðinlegur þáttur. Hvað er málið með Kym - í öllum þáttum. Hún hætti í CSI vegna samstarfsörðugleika við rauðhausinn en mér líkar hann ekki heldur. (Hvorki þáttinn né leikarann.) Mánudagar eru leiðinlegir sjónvarpsdagar og þá á maður að gera eitthvað annað. Ég fór til dæmis og kíkti á nýju íbúðina hjá Ace. Einmitt það.

2003-03-31T21:31:00.000Z

Manngallar mínir

Ég er vel meðvitaður um a.m.k. tvo manngalla mína (andstaðan við mannkosti). Auðvitað hef ég marga galla en þessir eru mér ofarlega í huga í dag.

Sá fyrri er sá að ég er alveg ótrúlega sólgin í súkkulaði. Ég var í Krónunni í dag og ég fann súkkulaðilykt langar leiðir. Síðan stóð ég lengi og mændi á súkkulaði rekkann. Munnvatnið byrjaði að renna og mér fannst ég ekki geta stjórnað mér (spauglaust). Næstum því alltaf þegar ég versla í matinn kaupi ég mér súkkulaðibar og háma það í mig um leið og ég kem upp í bíl (Ath. Ég hef aldrei sagt Guðrúnu Birnu frá þessu). Stundum kaupi ég tvö og skil þá eitt eftir í hanskahólfinu til öryggis. Mér finnst Draumur og Rís einna best. Ég reyni að nota þennan veikleika minn til að skilja veikleika annarra, t.d. þeirra sem geta ekki ráðið við áfengisneyslu sína eða þeirra sem geta ekki hætt að reykja. Það er ekkert grín að vera veiklundaður fyrir einhverju en ég hugga mig við það að súkkulaði er skárra en t.d. áfengi og sígarettur.

Hinn manngalli minn er sá að skapvonnska annarra getur gert mig alveg óheyrilega skapvondan. Ég tel mig léttlundaðan að jafnaði en ef mér finnst fólk vera að pirra sig og vera með leiðindi út í mig fyrir hluti sem skipta ekki máli, þá get ég alveg misst mig. Þegar það gerist er besta ráðið að tala við hana Guðrúnu Birnu mína en hún getur oftast talið mig á að viðbrögð mín séu aðeins til að bæta gráu ofan á svart og að ég komi betur út með því að láta sem viðkomandi trufli mig ekki. Ég lenti í slíkum aðstæðum í vinnunni í dag en í kvöld er ég feginn að hafa haldið mínum hestum eins og gjarnan er sagt á enskri tungu.

2003-03-31T21:13:00.000Z

Bloggedíblogg

Ég blogga bara þegar mér sýnist. Ég nenni ekki að blogga til að halda úti einhverjum lesendahóp. Þegar allir gefast upp á blogginu mínu, þá byrja ég á að blogga aftur. Mér finnst svo glatað hvað sumir bloggarar eru oft að koma með einhverjar yfirlýsingar um að ætla að hætta blogga eða að þeir hafi nú ekki verið duglegir að blogga síðustu daga o.s.frv. Stundum læt ég líða mánuði og stundum blogga ég daglega. Það fer bara eftir því hvenær mig langar til að blogga og hvenær ekki. Ég stjórna blogginu mínu en ekki það mér. Ég skora svo á bloggara að hætta með yfirlýsingar um að ætla að hætta að blogga. Það er svo glatað að þurfa svo að hætta við að hætta eða byrja aftur eftir að vera hættir þegar maður fær svo löngunina til að blogga aftur.

2003-02-28T17:50:00.000Z

Sigur hér og sigur þar!

Í gærkvöldi vann Menntaskólinn á Akureyri sannfærandi sigur á liði Fjölbrauaskólans í Ármúla í Gettu betur. Ég fékk gæsahúð af stolti þegar ég sá að gamall skáti úr skátasveitinni minni, hann Bjarni, var fyrirliði MA liðsins. Bjarni byrjaði 11 ára í skátasveitinni Eskimóum á Akureyri, þar sem ég var sveitarforingi. Hann tók starfið strax mjög alvarlega og er enn mikill skáti. Ég man að þegar ég vígði hann sem skáta var hann sá eini sem kunni 100% skil á öllum spurningunum. Snemma beygðist krókur hans, segi ég nú bara. Áfram MA.

Vaka vann í gær í stúdentakosningunum. Ég var ánægður með það enda mikið af mínum vinum og vennslamönnum í forystusveit Vöku. Þau eru rosalega dugleg og gott fólk og gaman að þau skuli njóta þess í kosningunum. (Ekki þar með sagt að það sé ekki gott fólk í Röskvu líka.) Ég var búinn að spá því að Vaka héldi meiri hluta sínum í stúdentaráði og að hinn nýji listi, Háskólalistinn tæki 1 mann af Röskvu. Ég sagði að Háskólalistinn fengi 12-14% fylgi en raunin varð 11% og einn maður kosinn. Það hafa því orðið mikil umbrot í háskólápólitíkinni síðustu 2 ár en þar áður höfðu ekki orðið neinar breytingar í 10 ár þar sem Röskva hafði verið við völd. Til hamingju vökuliðar.

2003-02-22T23:47:00.000Z

Hitt og þetta!

-Til hamingju með útskriftirnar Atli viðskiptafræðingur, Telma líffræðingur og Gaui heimspekingur.

-Sverrir, mér finnst að Afturelding hefði átt að vinna. Mér finnst þú eiga skilið að fá verðlaun. Þú átt eftir að taka dollu áður en þú hættir í boltanum.

-Árshátíð starfsfólks Laugarnesskóla var í gærkvöldi. Þar heyrði ég lengsta skemmtiatriði ævi minnar. Guðmundur kennari frá Vestmannaeyjum sagði sögur af fólki í ca. 40 mín. Ég var látinn skemmta hátíðargestum með því að láta binda fyrir augun á mér, fara í uppþvottahanska og keppa við skólastjórann, sem var í sömu aðstöðu, um að klæða sig í nælonsokkabuxur. Það gekk ekki vel. Þegar dagskránni lauk kl. 24 tók við stanslausir slagarar að hætti DJ Dolla, t.d. með ABBA og GREASE + lög eins og Gleðibankinn, Ó hókí hókí pókí og Kokkurinn í kapessunni.

-Landsþing Framsóknarflokksins er í gangi. Það er rosa fjör að starfi pólitíkinni og ungir framsóknarmenn eru duglegir við að hafa gaman af hlutunum. Halldór er náttúrlega að slá í gegn með tillögu um skattalækun og það er góður andi í þingmönnum.

-Kjartan Sveinn er farinn að skríða um allt og standa upp við borð og stóla. Hann er rosa hress og kátur en stundum dettur hann á skallann og þá kemur skeifa sem síðan breytist í grátur. Það er svo gaman að fylgjast með honum þroskast en hann varð 8 mánaða þann 18. febrúar.

-Guðrún Birna er dugleg að skrifa BA ritgerð þegar hún hefur tækifæri til. Þetta var fyrsta vikan sem Kjartan Sveinn fór alla 5 dagana til dagmömmunnar og nú er ritgerðin komin í 17 bls...ekki nema ca. 33 eftir.

-Á morgun ætla ég að setja í þvottavél en hrúgan í svefnherberginu er að verða ókleif.

2003-02-16T00:22:00.000Z

Heima og heiman

Við höfum verið heima, fjölskyldan núna um helgina. Í gærkvöldi horfðum við á einkennilega tímaflakksmynd og Atli, Marinó og Þóra kíktu við. Í kvöld, laugardagskvöld, horfðum við svo á undankeppni Eurovision. Við spáðum Birgittu Húsvíking Haukdal sigri og Botnleðju 2. sætinu. Sú spá rættist en hún byggðist fyrst og fremst á almennum vinsældum flytjandenna fremur en lögunum. Mér fannst reyndar leðjan töff en það var samt enginn flottari en Benni á indjánatrommunni í fyrsta laginu. Ég hefði kosið hann ef ég hefði mátt velja.
Næsta helgi verður sennilega ekki alveg eins kósí og þessi. Þá verður landsþing Framsóknarflokksins með tilheyrandi veisluhöldum og dansleikjum, einnig verður þorrablót á Vetrargörðum, Atli og Telma eru búin að bjóða í útskriftarpartý og það er árshátíð hjá Laugarnesskóla. Ekki veit ég hvernig þetta á að geta farið allt saman.

Annars eru dagarnir vanalega þétt bókaðir og það er löngu hætt að vera fyndið hvað tíminn líður hratt. Vikur eru að verða að dögum, mánuðir að vikum og ár að mánuðum. Maður er ekki fyrr búinn að vera unglingur þegar maður þarf að fara huga að lífeyrinum. Maður ætti því ekki að eyða of miklum tíma í að hugsa um framtíðina, heldur njóta hvers dags eins og hann kemur af skepnunni. Ef maður nýtur ekki hversdagsins, þá er maður í vondum málum.

2003-01-25T11:20:00.000Z

Gamla myndin

Í dagblaðinu Degi sem gefinn var út á Akureyri, birtust stundum gamlar myndir og fólk átti að bera kennsl á þá sem á þeim voru. Eiki Svans hefur nú grafið upp eina gamla mynd sem birtist í Degi á sínum tíma og var þá ný. Ég birti hana hér sem gamla mynd og ber kennsl á fólkið eftir bestu getu.

Efri röð frá vinstri:Jói Bjarna; þjálfari og tískukóngur. Takið eftir sokkunum sem fara yfir skálmarnar. Þetta þótti mjög cool á þessum tíma.
Skari Braga; Einn af lykilleikmönnum liðsins en varð síðar einn efnilegasti fótboltamaður landsins. Síðan eru liðin mörg kg.
Gestur Einars.; Síðar þekktur fyrir að gefa út Peruna í framhaldsskólunum á Akureyri.
Eiki Svans.; Góð hægri skytta á þessum tíma en ákvað að snúa sér að badmintoni og góðgerðarmálum.
Baldur; Var þekktur fyrir að vinna í spilakössum á ferðalögum okkar. Núna sé ég hann oft í lopapeysu og að reykja fyrir framan HÍ.
Maggi Matumbo; Hefur ferðast um allar heimsálfur síðan í 8. bekk og á kærustur í þeim flestum.
Kiddi; Kokkur, brandarakall og eftirherma. Ef einhvern vantaði á æfingu hermdi Kiddi bara eftir honum.
Ég, Gummi bloggari; Einn efnilegsti vinstrihornamaður sem þjóðin hefur átt en því miður uppgötvuðust þessir hæfileikar aldrei. Ég ákvað því að snú mér að skátahreyfingunni þar sem aldrei er farið hraðar en hægasti maður.
Sverrir Björnsson; Meikaði það í handboltanum varð Íslandsmeistari með KA þegar Patrekur og Duranona spiluð með honum og Alfreð var að þjálfa.
Raggi mortó; Er einn heitasti leikmaður sem KA hefur átt. Hann var spjaldakongur mörg ár í röð.

Neðri röð frá vinstri
Raggi markmaður; var frægur fyrir að blóta.
Dóri feiti; Varð mjór og er nú atvinnumaður í handbolta í Þýskalandi.
Villi naglbítu; Leikglaður línumaður en snéri sér að tónlistinni og sjónvarpsþáttagerð.
Gunni dí; er einkaþjálfari í dag.
Fredrikó; Frikki gaf sig 120% í allar æfingar og sprengdi hljóðhimnur í mörgum ef honum mislíkaði.
Tommi; Sannur fyrirliði jafnt innan vallar sem utan.
Buni; Við spiluðum báðir vinstra horn þar sem samkenndin var meiri en samkeppnin.
Ísi; Ísi spilaði í hægra horni en hvarf mér sjónum skömmu eftir þessa myndatöku.

Takið eftir því hvað uppstillingin er asnaleg. Allir með krosslagðar hendur eins og saumaklúbbur af feitum konum sem reyna að fela bumbuna.

2003-01-25T11:11:00.000Z

Bóndadagurinn

Bóndadagurinn gaf vel af sér þetta árið. Frúin gaf mér nýja diskinn með Bubba, Sól að morgni og eldaði síðan sérlega góðan kjúklingarétt. Fleiri svona bóndadaga, segi ég nú bara.

2003-01-24T17:16:00.000Z

Enskumælandi Íslendingar

Ég var að koma úr sameiginlega þvottahúsinu hér í byggingunni. Þar var par að hamast með þvott fyrir framan þvottavélarnar. Ég spurði hvort þau væru nokkuð að nota eina þeirra sem virtist laus. Þá kom eitthvað fát á þau. Þau horfðu á mig eins og ég væri eitthvað skrýtinn og sögðu svo eitthvað mjög skrýtið við hvort annað sem ég skildi ekki, en fannst vera enska. Ég spurði þá aftur að bragði; ,,Are you using this one?" Stelpan kom þá til mín og fór að reyna að útskýra á ensku að vélin sú arna væri sennilega biluð. Það var verst að samskiptin voru ekki að ganga alveg nógu vel og greinilegt að hvorugt okkar hafði dvalið lengi lengi í Englangi. ,,Broken" var samt niðurstaðan og var stelpunni augsýnilega létt að losna við þennan dularfulla útlending sem var með fulla körfu af sokkum og nærbuxum.
Ég ákvað þá að halda mína leið til baka en ég var varla lagður af stað, þegar stúlkan snýr sér að kærastanum og segir; ,,Jón, viltu réttu mér þvottakörfuna".

Aðstæðurnar voru nú orðnar mjög dularfullar og ekki tók betra við. Þegar ég kom fram á gang fann í litla stelpu sem sótti fast að komast í gegnum dyrnar og upp stigann, sem var sú leið sem ég hugðist fara. Ég þorði náttúrlega ekki að opna dyrnar og ekki kunni við að kalla á Jón og láta vita á reiprennandi íslensku. Þá hefði komist upp um mig hvað ég væri dularfullur að tala ensku inni í þvottahúsinu. Ég brá því á það ráð að segja endalaust ,,hæ, hæ" við litlu stelpuna og vona að foreldrarnir færu að skila sér úr þvottahúsinu. Hæ, er nefnilega svona orð sem erlendir stúdentar ættu að vera búnir að læra í janúar, hugsaði ég. Síðan kom Jón og við kinkuðum kolli hvor til annars eins og menn gera þegar þeir vilja ekki ómaka sig við að tala á útlensku.

Þessi fjölskylda verður örugglega hissa þegar þau hitta mig næst að blaðra við Guðrúnu Birnu á svona líka góðri íslensku.

2003-01-14T14:47:00.000Z

Á þeytingi milli skóla

Ég er nú byrjaður aftur að sækja tíma í HÍ. Fór strax í morgun kl. 8 í Gerð námskrár og fræðsluefnis sem kennt er innan kennslufræði. Keyrði svo á fullu í Laugarnesgrunnskóla til að sinna skyldunum þar. Fór svo aftur á enn meiri hraða í HÍ eftir hádegi í áfangann, aðhvarfsgreining. Ég ætti því að fá nóg af skólabyggingum þessa önnina. Það verður þó fínt ef þetta gengur svona upp því þá klára ég allt nema lokaritgerð í MPA náminu í vor og get einnig sleppt námslánapakkanum um leið. Ég er því nokkuð kátur í upphafi annar.

Guðrún Birna mín fékk einkunnina sína, í haustannaráfanganum, áðan. Hún stóð sig auðvitað rosa vel og við Kjartan Sveinn erum rosa stoltir af henni ;-)

2003-01-14T14:38:00.000Z

Engin svik

Óni hefur sett sig í samband við mig vegna helgarskrifana. Hann segist kunna því illa að vera kendur við svik því það hafi ekki verið honum að kenna að bústaðurinn hafi verið rafmagnslaus. Ég bið því Óna innilegrar afsökunar á dónaskapnum í mér ;-)

2003-01-12T23:05:00.000Z

Nýr bloggari

Anna hans Jens (bæði skátar að norðan) er farin að blogga. Þau búa í Frakklandi í vetur svo það er jákvætt að hún sé að blogga. Þannig fær maður fréttir af þeim og fær líka sjónarhorn á líf með Frökkum.

2003-01-12T23:01:00.000Z

Helgin

Föstudagskvöld; Video með frúnni. Við horfðum á Murder by numbers með Söndru Bullock. Fyrsti klukkutíminn var skelfilegur en þetta reddaðist í lokin. Aumingja Sandra er alltaf eins í öllum myndum en ég hef nú svo sem alveg verið ánægður með hana í ákveðnum hlutverkum. Hún var samt ekki að virka í þessari mynd.

Laugardagur; Óni gerðist dónalegur og sveik bústaðaferð án þess að láta nokkurn vita. Tók til í íbúðinni í tilefni þess og þvoði helling af þvotti. Fór svo í kaffi til Önnu og Styrmis. Um kvöldið fór GB í saumaklúbbspartý og við karlarnir spiluðum Risk hér heima. Þjóðverjinn kom, sá og sigraði með því að sameina heimsbyggðina undir hinum blá her.

Sunnudagur; Svaf alveg rosalega vel í stofusófanum yfir Silfri Egils. Fór svo á Framsóknarfund og skipulagði grænu byltinguna.

2003-01-09T23:27:00.000Z

Nýjar myndir...

...á síðunni hans Kjartans Sveins. Nú er loksins búið að skanna nokkrar myndir sem við tókum af Kjartani Sveini fyrir jól. Endilega kíkið á þær og skrifið eitthvað skemmtilegt í gestabókina hans ;-)

Sá gamli var líka eitthvað að fikta í heimasíðunni sinni á hi-svæðinu, t.d. komnar inn nokkrar góðar myndir af gömlu félögunum.

2003-01-04T14:51:00.000Z

Feðgar einir heima

Guðrún Birna er komin á æskustöðvarnar í Vestmannaeyjum að samfangna stúdentsútskrift og 25 ára afmæli vinkonu sinnar. Við feðgar erum því 2 saman heima í sólarhring í kvennmannsleysi. Við erum ekkert stressaðir yfir því að vera einir. Við ætlum bara að slaka vel á, vaka frameftir, fara seint á fætur og vera í mjög ósamstæðum fötum ;-)

Við erum líka ánægðir með að húsmóðirin á heimilinu geti slakað á frá amstrinu sem fylgir okkur feðgunum. Hún á svo sannarlega skilið að fara í ,,utanlandsferð" til Vestmannaeyja eftir 9 mánaða meðgöngu og hálfs ár uppeldisstörf. Vonandi að hún verði bara ekki of stressuð yfir ástandinu hér heima á meðan... :-o

2003-01-03T01:09:00.000Z

Dinner

Anna og Styrmir voru svo elskuleg að bjóða okkur í dinner í gærkvöldi. Þau eru með bestu kokkum landsins að mínu mati. Á matseðlinum var hrikalega góður kjúklingur, maisstönglar og hvítlauksbrauð sem skolað var niður með bjór og síðan var ís í eftirrétt og kaffi. Mér leið eins og rómverskum keisara á eftir. Takk, takk elsku Anna og Styrmir, eða eins og við sögðum alltaf í skátunum fyrir norðan; Takk fyrir matinn, hann var æði, super fæði, Bauta gæði.

2003-01-01T22:24:00.000Z

Nýtt ár

Á slíkum tímamótum er algengt í þjóðmenningu okkar að spá fyrir næsta ári. Sumir nota garnir, aðrir kúlur, einhverjir nota stjörnurnar o.s.frv. Ég hef verið að spá svolítið í slíkar spár. Samkvæmt þeim get ég spáð fyrir lesendum mínum...

Þú munt fara í ferðalag á árinu. Það er einhver í kringum þig að fara flytja og ég sé líka bíl. Það mun einhver í kringum þig vera að vesenast með bíl, selja eða kaupa bíl eða láta gera við bílinn sinn. Þú munt upplifa gleði á árinu en einnig verður þú fyrir vonbrigðum með ákveðna hluti í lífi þínu. Þú munt gera eitthvað skemmtilegt á afmælinu þínu. Almennt séð verður árið gott að þínu mati.

Hvað þjóðmálin varðar spái ég því að kosið verði til Alþingis í vor eftir langa setu núverandi ríkisstjórnar. Ekki verða allir ánægðir með niðurstöður kosninganna en hún verður samt sem áður í takt við vilja almennings. Veðrið á landinu verður kalt fyrstu mánuði ársins en svo hlýnar og um mitt ár verður orðið gott veður með blóm í haga. Þegar á líður síðmánuði fer að dimma meira og þá fer að kólna aftur.

Gleðilegt nýtt ár allir saman og takk fyrir það gamla.

2002-12-28T23:15:00.000Z

Blessuð landsbyggðin

Obba, vinkona Guðrúnar Birnu, er oftar en ekki hnitin í umræðu. Í jólaglöggi fyrir jól setti hún fram tilgátu sem varð mér hugleikin. Tilgátan var sú að gestrisni ykist eftir því sem fjarlægðin við höfuðborgina ykist. Ég tel þetta skarplega athugað og mikið sannleikskorn um íslenska þjóðmenningu.

Af sama meiði datt mér í hug, eftir dvöl mína á Akureyri og frásögn foreldra minna af för sinni til Húsavíkur, að hlutfall jólasería í gluggum, per íbúa, ykist við minnkandi íbúafjölda sveitarfélaga.

Ég skora á þjóð- og mannfræðinema að rannsaka þessar tilgátur. Við Obba getum örugglega veitt ykkur umsagnir... :-)

2002-12-28T22:38:00.000Z

Jól fyrir norðan

Það var alveg stórgott að dvelja í höfuðstað Norðurlands um jólin. Ekki bara vegna kosta Akureyrar hleldur fyrst og fremst vegna þess að maður var í faðmi fjöskyldunnar og með sína eigin með sér. Hvað er betra en að vera á hótel mömmu með endalausa barnapössun, fullt af góðum mat og frúnna í farteskinu?

Punktar af því helsta:
- Árviss börger með strákunum. Við höfum fengið okkur börger í miðbænum á Þorláksmessu síðan við vorum 14 ára og ég hef aldrei misst af því. Þetta er hluti af jólaundirbúningnum.
- Jólatréð tókst á loft undan jólapakkaflóðinu. Kjartan Sveinn var að hala inn góðu hali þessi fyrstu jól. Alveg spurning um að stækka íbúðina til að koma öllu fyrir.
- Fullt af skemmtilegum kortum og endalaust kjöt að éta.
- Kíkti á Risk með skátunum. Notni burgrrr var í stórsókn með framsóknarherjunum.
- Spilaði Íslandsspilið með strákunum, þar sem við Tómas sigldum hægt og örugglega í strand. Skari og Steini snéru vonlausri stöðu í sigur með 2 milljón króna lottóvinning.
- Rúntur með Sverreeeee, eins og Kiddi kýs að kalla Sveppinn. Sátum tveir í bílnum kl. 01:00 á Eimskipsbryggjunni og hámuðum í okkur risapizzu. Athæfið vakti forvitni laganna varða.
- Fórum í heimsókn til Afa gamla. Hann verður 91 árs á gamlárskvöld. Hann er samt mun hressari og skemmtilegri en margir af yngri kynslóðinni í dag. Mér finnst kallinn alveg frábær og það er hrikalega skemmtilegt að spjalla við hann. Ég kalla afa yfirleitt kónginn, en hann er alveg eins og kóngur í ríki sínu þar sem hann sér um sig sjálfur í húsinu sínu, lætur engan segja sér fyrir verkum, reykir vindil og pípu til skiptis og þylur manni lífsreglurnar.
-Tvær ferðir í Bíó. Fyrst Bondinn og síðan Stella. Bondinn er náttúrlega skylda enda stendur hann alltaf fyrir sínu. Stella var hins vegar vonbrigði, því miður.
- Bolti. Hinn árlegi jólabolti fór fram í íþróttahúsinu á Þelamörk. Óbilandi seigla Ásgeirs, óbifandi skrokkur Buna í markinu, reynsla og snerpa Tómasar auk grófra og tilviljanakenndra brota minna á andstæðingunum snéru vonlausri stöðu í sigur á endasprettinum.

Nú er maður kominn aftur í borgina. Það er gott að vera kominn aftur heim í íbúðina sína. Öllum sem komu að jólunum mínum fyrir norðan þakka ég ánægulegar stundir og einum of fallegar og góðar gjafir :-) Þið eruð yndi. GB fær spes þakkir fyrir að koma norður yfir heiðar til að halda jólin.

2002-12-13T21:55:00.000Z

Matvælakynningar

Það er fínt að fara í Hagkaup um þessar mundir. Ég skrapp áðan út á Eiðistorg eftir nauðsynjum. Eftir að hafa farið í gegnum búðina skilaði ég mér saddur, sæll og nánast tómhentur að afgreiðsluborðinu, enda lítið með það að gera að versla í matinn eftir allar kynningarnar.

1. borð; ,,Má bjóða þér jólaís?" Ég nenti ekki að svara, greip ísinn sem er sá sami og er alltaf á jólaborðinu hennar mömmu fyrir norðan, lyngdi aftur augunum og skrapp að jólborðinu í huganum. Nammmm, en yndislegt. Vaknaði aftur upp við röfl um tilboðsverð á ísnum og fór.

2. borð; Royal búðingar. ,,Humm, má ég smakka?" sagði ég. Eins og ég hafi aldrei smakkað Royal búðing. Skátahreyfingin á Akureyri ólst upp á Royal. Ég smakkað náttúrlega allar tegundirnar á meðan tvær ungar stúlkur reyndu að sannfæra mig um að það væri hægt að nota þetta út í bollu. Gefur útlit mitt í skyn að ég drekki mikla bollu, hugsaði ég? Ekki heillaði bolluáróðurinn mig og ekki dugði 14% tilboðsaflsláttur. Kannski vegna þess að það er til ársbyrgðar af Royal upp í skáp og hefur verið það síðustu 2 árin?

3. borð: ,,Má bjóða þér súkkulaði?" Já takk, sagði ég. Ég elska alvöru súkkulagði (ekkert kakó hér). Rétt eins og hjá ömmu í Engi í gamladaga á jóladag. Þá lá öll familyan í súkkulaði og brauðtertum. Í Hagkaupum voru reyndar bara smákökur með en hvað með það. Hungrið var að seðjast. ,,Er einhver afsláttur í gangi?" spurði ég. ,,Ha, nei, ekkert svoleiðis. Bara sama verðið og alltaf," var svarið. Stefnan var tekin á næsta borð...

4. borð; ,,Endilega fáðu þér jólasíld." Síld, hugsaði ég. Frábært, ég tými aldrei að kaupa mér síld og hér get ég étið frítt. Síld með Þrumara (rúgbrauði) og öllu. ,,Þetta er jóla-nammið í ár, engin spurning" sagði stúlkan við borðið. ,,Nei, engin spurning" apaði ég eftir henni. Gangan hélt áfram en sporin voru nú þyngri en áður...

5. borðið, (sem var ekkert borð); Kona stóð upp á endann með körfu fulla af Celabration, uppáhaldsnamminu mínu. Ég gekk að konunni, sem hafði lítinn áhuga á starfinu að því er virtist. Ég hafði frumkvæðið; ,,Má ég?" Síðan óð ég með krumlurnar ofan í góssið og krabbaði upp hátíðarhöldin. Bréfin dreifðust svo eftir matargöngunum í búðinni og þeir sem vilja feta í fótspor mín geta nú rakið slóðina.

Ég var nú orðinn nokkuð saddur og markmiðinu með ferðinni því nær lokið. Það var lítið annað en skeiniklútar fyrir Kjartan Svein sem fóru í matarkörfuna í þessari ferð, enda bumban orðin þaninn. Takk fyrir mig, kæru Hagkaup.

2002-12-13T00:27:00.000Z

Jólakort

Ég er búinn að skrifa á all mörg jólakort. Við reiknum með að senda yfir 60 í ár. Þau verða að duga fyrir næstu ár líka því þetta er ekkert smá ,,pakki". Ég fór á pósthúsið með smá slatta. Síðasti dagur til útlanda er nefnilega í dag. Það fóru 2 bréf til Asturíkis, 2 til USA, 1 til Noregs og 1 til Danmerkur. (Gulli minn, þú færð þitt bara í vor. Ég hef ekki hugmynd um heimilisfangið þitt í Svíþjóð.) Svo fóru nokkur til Vestmannaeyja (sem tilheyrir reyndar íslenska ríkinu) auk Seyðisfjarðar, Húsavíkur og Egilsstaða. Það er gaman að senda kort út um allt en maður er alveg hættur að kunna á pósthúsin. Þetta er eins og með bankana. Maður fer aldrei í þessar þjónustustöðvar þar sem þetta er allt komið hingað í tölvuna.
Það var svo löng röð á pósthúsinu að ég höndlaði ekki að fatta að taka með mér frímerkin, fara út aftur, líma frímerkin á kortin og setja í bréfalúgu hjá póstinum. Þegar konan ætlaði að senda mig í burtu með frímerki sagði ég nei takk. Ég sá nefnilega fyrir mér að ég þyrfti að standa eins og Sleikirstaur aftast í röðinni og koma aftur til konunnar hálftíma seinna þegar röðin kæma aftur að mér. Núna fá jólakortin okkar bara ljótan greiðslustimpil hjá póstinum, svona eins og gluggabréf og engin falleg jólafrímerki. Þegar ég fattaði þetta á leiðinni út, hugsaði ég, þessar gömlu konur í röðinni kunna alla vega ekkert að senda tölvupóst og SMS. (...Ég var svolítið afbrýðissamur út í að þær kunna á pósthúsið). Já, tíminn líður hratt á gervihnattaöld.

2002-12-13T00:07:00.000Z

Flugumferðarstjóri

Hjalti , stórvinur minn, ætlar að verða flugumferðarstjóri. En það er eitt að verða og annað að vera. Frúin á heimilinu, hún Guðrún Birna mín, hefur verið fengið nafnbótina flugumferðarstjóri á heimilinu. Hún er búin að vera læra fyrir próf á morgun og á meðan hef ég gert það sem í mínu valdi stendur til að halda heimilinu á réttunni. Það þýðir þó ekki að mér sé treyst fyrir því að fullu. GB situr gjarnan við eldhúsborðið, sem er í miðri íbúðinni, og stýrir af mikilli röggsemi hvernig við feðgarnir eigum að vera, hvar og hvenær. Við sækjum hins vegar stíft í stjórnleysið og áður en langt líður á seinnipartinn erum við jafnan farnir út í bæ eða búnir að senda mömmuna niður í lesherbergi. Þá erum við sko í góðum málum, við strákarnir, það sem eftir lifir dags.

2002-12-08T23:44:00.000Z

Í skólanum, í skólanum...

er skemmtilegt að vera. Hver dagur hefur einhverjar skemmtilegar og nýjar hliðar þegar maður er í nærveru tuttugu krakka á aldrinum 6-7 ára.

Stundum ræða börnin um það hvort Guð geti verið til. Einn trúði ekki á Guð en hin börnin rökstuddu sitt mál með því að án Guðs værum við ekki til, þar sem Guð skapaði fyrsta fólkið og ef hann/hún hefði ekki gert það, hefðum við ekki getað orðið til.
Ég er svo skyndilega kominn í þá stöðu að vera kristinboði á vegum hins opinbera. Sem starfsmaður skólans tel ég það opinbera skyldu mína að fylgja hinu kristilega námsefni eftir og upplýsa börnin um að við Íslendingar trúum á Jesú krist og allt það sem honum fylgir. Við höfum verið að gera verkefni um Örkina hans Nóa og svo eru lesnar bíblíusögur á hverjum degi fram að jólum. Ætli ég verði ekki bara orðinn frelsaður þegar hátíðin gengur í garð.

Nú svo spynnast að sjálfsögðu langar og strangar rökræður um tilvist jólasveinanna. Börnin eru mismunandi hörðnuð í þessum efnum og það brjótast jafnan út stór spurningarmerki í andlitum hinn saklausu barna þegar þeir hörðustu fullyrða að það séu engir jólasveinar til.

Í skólanum er ég nú þekktur sem Fánakallinn. Maður þarf nú ekki að vera gamall til að verða kall, segi ég nú bara. Eftir að hafa kynnt íslanska fánann fyrir öllum nemendum skólans, hef ég fengið þetta einkennilega viðurnefni. Það er samt ágætt að þau virtust meðtaka það að bera ætti virðingu fyrir fánanum svo ég treysti á að Fánakallinn njóti góðs af því. (Að bera ,,virðingu" hefur þó yfirleitt ekki merkingu í hugum yngri krakkanna. Þá talar maður bara um að vera ,,góð/-ur" og við fánann / Fánakallinn :-) Þannig þarf maður oft að aðlaga sig mismunandi málþroska, sem getur verið annsi kúnstugt.)

Að lokum verð ég að segja að mér þótti mikil upphefð í því að einn drengurinn spurði hvort ég gæti ekki verið faðir sinn. Daginn áður hafði hann viljað að Logi Bergmann, fréttamaður og Gettu betur spyrill, væri faðir sinn en mér tókst að slá Loga út. Ég veit nú ekki hvað alvöru pabbinn hefði sagt, hefði hann heyrt í syni sínum, en ég held að þetta hafi samt ekki verið illa meint í hans garð. Drengurinn taldi sig einfaldlega geta lengi á sig feðrum bætt.

2002-12-07T22:03:00.000Z

Partímyndir

Eiki Svans er stundum einum of duglegur að mæta með cameruna í partíin og oft varla birtingarhæft sem á hana næst. Það eru þó alveg ólíklegustu andlitsdrættir og pósur sem nást á slíkum stundum. Eiki var að birta nýjustu myndirnar sínar og liggur maður jafnan í hláturskrampa eftir slíkar birtingar. Ég má til með að deila nokkrum myndum með lesendum hinnar vænu, grænu síðu.

Það er ómögulegt (og sennilega ekki siðlegt) að ímynda sér hvað veldur þessum svipbrigðum Tómasar.

Það er ekkert skrítið við svipinn á Kidda. Svona verður maður bara af því að fara í sjómann við Eika.

Þarna er Tómas að þakka mér fyrir frábæra bloggsíðu á árinu sem er að líða. Það er ekkert grín að lenda í kossunum hans Tómasar.

Ég þakka þessu góða fólki fyrir skemmtunina. F.v. Elmar, Kiddi, Eiki, Gummi, Alice, Atli og Silja. (Á myndina vantar GB mína, Telmu hans Atla, Önnu hans Kidda og Tómas.)

2002-12-07T20:19:00.000Z

Jólaglögg

Starfsmenn Laugarnesskóla voru óvenju glöggir í gærkvöldi. Þá var farið upp í sveit og skorin lauf í brauð ásamt því að drekka jólaglögg. Það var rosa gaman að skrera út en það eru orðin 5 ár síðan ég greip í brauð og skar út lauf. Síðan blandaði maður óvenju miklu geði og komst að því að maður hafði ýmsar tengingar við fjölda samstarfsmanna. Sumir eru skyldir mér, aðrir eiga sömu vini og ég og enn aðrir eru aldir upp á sömu svæðum og ég þekkja því mikið af fólki sem ég þekki líka. Þar sannast hið fornkveðna, Ísland er ótrúlega lítið land.

Að loknu jólaglögginu braut ég odd á oflæti mínu og hafði viðkomu í miðbæ Reyjavíkur. Ég sá að lítið hafði breyst á einu og hálfu ári. Þetta var bara bölvuð fyllerísmenning. Það var hins vegar mjög gaman að vera með góðu fólki og hrista skankana á dansgólfinu. Þegar maður fer ekki í bæinn verður það til þess að maður dansar allt of sjaldan.

2002-12-05T12:34:00.000Z

Það er brjálað veður...

en það er nú ekkert miðað við brjálæðið hér í stofunni. Börnin mega ekki fara út og ég sit hérna með þeim í stofunni í fríminútum. Þetta er eins og í Látrabjargi, stærstu fuglabyggð í Evrópu.

2002-12-04T16:54:00.000Z

Bangsapabbi bloggar

Hjalti Valþórsson, eðalmaður, er farinn að blogga. Slóðin er http://www.bangsapabbi.blogspot.com. Það verður spennandi að lesa skrif hans, en ég vara alla við að taka mark á orðum hans, sérstaklega ef orð hans varða á nokkurn hátt mína persónu. Þó Hjalti sé rugludallur hinn mesti, er hann afar skemmtilegur og góður drengur. Ég fagna því komu hans í heim bloggara.

Þess má geta að Hjalti er kommúnisti. Hann hyggur á endurreisn Kommúnistaflokks Íslands með markvissu sellustarfi sem enda mun með byltingunni óhjákvæmilegu.

2002-11-30T12:05:00.000Z

Íslenski fáninn

Í gær var ég opinber sérfæðingur um íslenska fánann. Reykjavíkurborg greiddi mér laun fyrir að tala um íslenska fánann við öll börn á aldrinum 6-11 ára í Laugarneshverfinu. Ástæðan var sú að í tilefni 1. des. var þemadagskrá í Laugarnesskóla þar sem börnin í skólanum fóru á milli pósta og lærðu hitt og þetta um þjóðlífið. Skátinn var náttúrulega settur í að hafa fyrirlestur um fánann okkar. Ég sýndi börnunum myndir af því hvernig hugmyndir manna um fánann breyttust, sagði þeim frá fánareglunum, hvað litirnir í fánanum þýða og hvenær fánadagarnir eru. Síðan kryddaði ég þetta allt saman með léttri umræðu um fullveldi og sjálfstæði Íslendinga. Hrafnhildur, sem er líka skáti og sveitarforingi með Sigga T, tók svo við börnunum úti og leifði þeim að flagga.

Ég hélt uppi heraga og það heyrðist ekki múkk í börnunum. Ég bannaði allar spurningar og frásagnir og ef heyrðist múkk í einhverjum bauð ég honum umsvifalaust að fara burt. Ef ég bauð upp á spurningar, þóttist ég ekki heyra í þeim sem gjömmuðu rétta svarið upp og benti á þá sem biðu með upprétta hönd og leifði þeim að endurtaka svarið við mikinn fögnuð minn. Þetta hljómar kannski harðneskjulegt í fyrstu en trúið mér, ég er afar sanngjarn og góður við börnin. Það þarf bara aga en agaleysi er eitt mesta vandamál barna í dag.

Til að gorta aðeins, þá voru allir rosa ánægðir með mig. Ég fékk fjölda áskorana um að gerast kennari. Satt best að segja tók ég þær áskoranir svolítið nærri mér því ég veit að ég hefði mjög gaman af því að kenna. Þetta var því einn af þessum dögum sem maður er svo ánægður með allt og alla.

2002-11-30T11:34:00.000Z

Fjölbreytt kvölddagskrá um vikuna sem er að líða

mánudagur; GB á kaffihús og við feðgar í góðu tjilli hér heima.
þriðjudagur; Matarboð og veggtennis. Anna og Styrmir komu í mat og við Styrmir tókum rosalega á því í veggtennis í Sporthúsinu.
miðvikudagur; Kaffihúsakvöld hjá ungum framsóknarmönnum. Kolbrún Bergþórsdóttir, sem skrásetti fyrsta bindi ævisögu Jóns Baldvins, kom og spjallaði við okkur. Hún var rosa skemmtileg og gaman að heyra sögurnar um Jón. Ég hlakka til að glugga í bókina hennar.
fimmtudagur; Fótbolti með strákunum í Valshúsinu.
föstudagur; Afslöpun með frúnni. Atli sendi okkur fullt af Friends þáttum og við horfðum á þá í tölvunni. Takk Atli.
laugardagur; Jólahlaðborð hjá Sambandi íslenskra sveitarfélaga. Frúnni var líka boðið svo Kjartan Sveinn er að fara sofa heima hjá afa og ömmu á nesinu í fyrsta sinn :-o
sunnudagur; Leikús. Við GB ætlum að sjá ,,Með fulla vasa af grjóti" í Þjóðleikhúsinu. Hilmir Snær og Stefán Karl eru aðalleikarar. Það er látið rosalega vel af þessu verki.

2002-11-24T11:18:00.000Z

Samsæti í gærkvöldi

Hjalti og Hlynur komu í gærkvöldi. Það var rosa fínt en við hittumst því miður allt of sjaldan. Hlynur kom að vanda með kínverskan bjór en dósirnar eru með flipa til að opna en ekki áföstum upptakara eins og við þekkjum og sló í gegn á Íslandi á seinni hluta 9. áratugarinns. Dósirnar höfðu því nett rómantískt yfirbragð horfins tíma. Við rifjuðum upp góða tíma í MA en nú styttist í 5 ára útskriftarafmæli okkar. Það verður rosa gaman að hittast í Höllinni á Akureyri 16. júní n.k. og halda upp á það.
Síðan urðu mannaskipti og Marinó kom en Hlynur fór. Marinó hafði með sér drykk sem hann kaus að kalla Castró Cola. Það er drykkur sem fundinn var upp í útskriftarferð MA til Mexíkó og Kúbu. (Á Kúbu er mun minna framboð af gosdrykkjum en víni. Þeir fylltu því glösin af rótsterku rommi og lituðu það með smá gosi.) Þá var nú komin ástæða til að hringja í Valda Víðis en því miður komst hann ekki. Valdi var nefnilega mikill aðdáandi Castró Cola í þessari ferð. Stundum kom Valdi í heimsókn í herbergið okkar Hjalta, Marinós og Jens. Þá fékk Valdi íslenskt brennivín eins og hann gat í sig látið. Einar Hafberg varð svo að taka afleiðingunum en Einar var herbergisfélagi Valda. Einar kom þá gjarnan í heimsókn fullur ofstopa í okkar garð. Eftir það fékk hann viðurnefnið Einar Skap. Þetta voru góðir dagar og margs er að minnast.
Eftir spjallið við Valda hófust einræður Marinós þar sem hann fræddi okkur Hjalta af miklum móð um draumaveröld hans og Péturs Blöndals, sjálfstæðismanns. Svona verða menn víst af því að vinna í Kaupþingi, Wall Street Íslands.

2002-11-23T03:35:00.000Z

Flottir félagar

Það var rosalega gaman að hitta Tomma og Sverri í kvöld, föstudagskvöld. Við fórum á stúdentakjallarann, eins og sönnum stúdentum sæmir, fyrst í stað en færðum okkur síðan yfir í Tjarnargötuna hjá Tomma. Það er alltaf gaman að koma þangað, sérstaklega í ljósi þess að þar bjó ég 2 vetur ævi minnar. Sverrir og Tommi fóru á kostum eins og þerra var vísa. Við leystum ýmsar ráðgátur í sameiningu þó ég hafi ekki alveg náð skilgreiningu Tómasar á Barrokktímabilinu. Það var eitthvað súríalískt við það eins og kvöldið sjálft.

2002-11-21T00:07:00.000Z

Eistland-Ísland

Það eru nú ljótu Ís-lendingarnir sem geta ekki unnið Eistland í landsleik í fótbolta þegar leikurinn fer fram á ís. Áferð knattspyrnunnar var lítið betri í þessum landsleik í dag heldur en hjá okkur félögunum í 3. bekk 26 stofu í grunnskólanum á Húsavík veturinn 1986-87. Þá spiluðum við yfirleitt í frímínútum þar sem mörkin voru hálf lokuð af snjósköflum og blastboltinn stoppaði alltaf strax ofan í fótsporunum okkar í snjónum. Það voru greinilega ekki Húsvíkingar í landsliðinu í dag.

2002-11-20T23:58:00.000Z

Bloggaholic

Konan mín er Bloggaholic. Það er ekki viðlit að ná sambandi við Guðrúnu Birnu vegna bloggsánauðar hennar og ef tilviljun veldur því að við getum rætt málin, þá segir hún reglulega að hún þurfi að fara blogga um viðkomandi málefni. Hilma kom þess vegna með mjög góða ábendingu. Ég gæti prófað að senda konunni minni tölvupóst eða skrifað blogg sem ég beini til hennar ef ég þarf að koma einhverju á framfæri við hana. Annars legg ég til að ávanasamtök Íslands (eða eitthvað svoleiðis) fari að stofna BA samtök sem halda fundi á algengsta bloggtímanum, þannig að bloggaholic fólk geti hist og rætt um fíkn sína og hvernig hún hafi verið farin að stjórna lífi þeirra.

Annars er ég ekkert að kvarta. Eins og Dr. Svanur Kristjánsson, stjórnmálafræðikennari, segir alltaf; Ég er bara að segja hvernig þetta er. Ég er ekkert að segja um það hvort þetta er gott eða slæmt. Vissulega getur verið gott hvað GB er háð blogginu. Maður getur þá alltaf eytt óendanlega miklum tíma í að horfa á fótbolta eða talað við vini sína í síma, en margir karlmenn eiga í erfiðleikum með það vegna stöðugra kvartana í betri helmingnum um að þau geri aldrei neitt saman o.s.frv. Síðan hef ég auðvitað líka óendanlega gaman af að lesa bloggið hennar GB. Hún er uppáhaldsbloggarinn minn ;-)

2002-11-17T00:51:00.000Z

Félagarnir að blogga

Við gömlu félagarnir af Brekkunni á Akureyri spjöllum saman á bloggsíðu sem hvergi er gefin upp. Þetta er ein skemmtilegast síða sem ég veit um enda um skemmtilega stráka að ræða. Við tökumst á um allt milli himins og jarðar, skipuleggjum partýin, birtum myndir sem okkur þykja athyglisverðar, leggjum gátur fyrir hvorn annan og rifjum upp síðustu daga og ár.

Nú er að koma kosningahiti í félagana og af því tilefni fá stjórnmál aukið pláss. Ég birti hér, án nokkurs leyfis, nýustu deilur okkar Buna sem er afarmikill Sjálfstæðismaður. Þess verður þó að geta að orðalag, staðreyndir, hugmyndir og fullyrðingar eru oft í öðrum víddum á blogginu okkar en við venjum okkur á annars staðar:
Buni tjáði sig fyrst...

krass krass, Tott and ham straujaðir nokkuð hraustlega af meisturunum, jamm jamm. Hvað er annars títt af bloggurum, það er ekki mikið að gerast hér, hmmmmmmmmm. Ég get sossum skilið það. ekki dettur mér neitt í hug, nema að reyna að biðja menn um að uppljóstra hvað þeir ætla að kjósa í vor. Mig vantar nauðsynlega stuðningsmenn og sýnist mér sem svo að bróðurpartur bloggara séu Frammarar(hórur). Það er ekki alveg nógu gott, en gæti reyndar verið verra. GFS; SAB; TJ og AHA hafa allir látið sjá sig á einu af hóruhúsi hóranna og dregur maður því þá ályktun að þeir kjósi hórumömmuna Dóra Á. EFE, ES, KÞK og Peddi litli eru ? og væri gaman að sjá þeirra álit hér. Ég hef reyndar grun um að Peddi litli AFC maður(winner) kjósi eitthvað fáránlegt, bara vegna þess að hann hefur alltaf gert það. Fyrir þá sem vita það ekki, ætlar Buni að kjósa D, til að tryggja áframhaldandi framþróun í landinu, sem verið hefur undir stjórn 'Íhaldsins(ég held að hórurnar hafi líka verið með, en hvað hafa þeir gert að viti?) Ætli Gummi og Sverrir hóruungar hafi eitthvað að segja um þetta? Nei, ég held ekki

X-D fyrir framtíðina
Buni
posted by Buni Bunason at 11/16/2002 04:25:17 PM

og svo ég...

Gæti frjálshyggjan komið aftan að Buna?

Það held ég að Buni væri ekki svona ánægður með D-ið ef þeir stæðu ekki svona vel við gjafakvótakerfið og raun ber vitni.

Hver veit hvað framtíðin ber í skauti sér? Margt getur breyst og það léti ekki svona í Buna ef hann eignaðist fatlað barn, yrði öryrki og foreldrar hans þyrftu að treysta á sjúkrastofnanir eftir einhver ár, þegar D-ið verður búið að taka velferðarkerfið ------(ekki birtingarhæft á "Allt er vænt..." blogginu"). Þá gæti Buni, eins og allir aðrir, þurft á ríkinu að halda til að sjá um umsjá barnsins, framfærslubætur fyrir sig og félagslega íbúð og heilbrigðisstofnanir sem hjúkruðu foreldrum hans. En Buni myndi grípa í tómt, þökk sé nýfrjálshyggjunni sem hann boðar í dag. Hann sæti þá upp með farlama stórfjölskyldu sem svæfi öll í sama herbergi og gengi í sömu fötunum í nokkur ár til að geta keypt sér í matinn. Buni sæi þá kannski lífið í nýju ljósi? Hann færi að boða róttækni á borð við að á Íslandi þyrfti öflugt félagslegt öryggisnet sem tæki við þeim sem ekki gætu séð sjálfum sér farborða. Fáir yrðu jafn beiskir í málflutningi sínum út í D-ið og Buni sem ætti þá ósk heitasta að Stengrímur J hefði fengið að halda við stjórnartaumanna síðustu árin. Hver væri þá orðinn hóra?

Ég segi NEI Buni. Hafnaðu slíkum öfgum strax frá deginum í dag. Statt vörð um frelsi einstaklingsins til athafna og viðskipta á þeim sviðum sem það á við um leið og þú tryggir landsmönnum öllum rétt til heilbrigðis- og menntaþjónustu á heimsmælikvarða. Settu X við B. Íslensk mannréttindi felast í frelsi til heilbrigðis, mennta og athafna handa öllum þegnum landsins. Gullni meðalvegurinn er hið eina réttlæti. Öfgar í aðrahvora áttina er kjaftæði og mun á endanum rústa samfélaginu. Við látum ekki fréttast að hér myndist fáttækrahverfi og villuráfandi fólk vegna auðvaldshyggju lítils hóps fjármagnseigenda sem taka okkur öll -----------(aftur ekki birtingarhæft hér) þegar þeim hentar, þig líka.

Annars er ég sammála því að Arsenal yfirspilaði Tottenham í dag, sem er gott.
posted by Gummi Sveinsson at 11/16/2002 11:19:37 PM

Enginn veit hvar þetta endar en annað er víst að aldrei verðum við sárir eða fúlir út í hvern annan. Stemmningin hefur alltaf verið þannig í hópnum að menn halda virðingu sinni þrátt fyrir skítkast og allir fá / og eiga að vera stollti af sínu, því annars væri þetta bara leiðinlegt.
Buni, þú ert ágætur þrátt fyrir allt og ég get alveg fyrirgefið þér þetta með D-ið. Þú ert nú ekki einn um þess frjálshyggjuvitleysu :-o

2002-11-15T23:41:00.000Z

Dagur íslenskrar tungu

Á íslensku má alltaf finna svar
og orða smátt og stórt sem er og var.

Dagur íslenskrar tungu er núna á laugardaginn. Höldum upp á það.

P.S. Ég er búinn að læra eitt varðandi íslenska tungu síðan ég byrjaði í Laugarnesskóla. Borgarbörnin eiga mjög erfitt með að skilja að það sé ,,T" en ekki ,,D" í StræTó og ,,P" en ,,B" í DroPi og svo framvegis. Þessi linmælska reykvískra skólabarna er því til vandræða og háborinnar skammar og réttast væri að senda þau í skólabúðir á hverju ári norður í land, þar sem menn PrumPa í sTamPinn.

2002-11-15T21:13:00.000Z

Takk Hilma

Hilma var sneggri en skugginn að kippa mér í liðinn. Ég er aftur kominn á spássíuna hjá henni. Mér líður strax miklu betur. Reyndar fylgir böggull skammrifi. Nú er vera mín á spássíunni orðin skilyrt. Ég verð að vera duglegur að blogga.

Þetta er góð regla hjá Hilmu. Takk frænka ;-)

2002-11-15T00:24:00.000Z

Hilma þó

Frænka mín, náttúrverndarsinnin, kvennfrelsishetjan, sagnfræðineminn og kærasta Marinós vinar míns Hilma Gunnarsdóttir frá Klambraseli í Norður-Þingeyjarsýslu, hefur afmáð tenginguna mína á blogginu sínu. Þvílík höfnun og það á alheimsnetinu. Hvað get ég gert Hilma, til að vinna mér aftur sess á spássíunni þinni í hópi hinna útvöldu?

2002-11-15T00:02:00.000Z

Slys í Laugarnesskóla

Það kom drengur til mín í frímínútum. Honum var mikið niðri fyrir en hann átti erfitt með að koma sér að efninu. Eftir móð og más bað hann mig að líta á vin sinn sem lá hreyfingarlaus undir leiktæki. Á leiðinni að hinum slasaða bætti hann við að vinur sinn hefði dottið og kúlAN í pungnum á honum hefði sprungið.

Annars eru stöðugt að koma upp vandamál í frímínútunum. Flest lúta þau að óréttmætri valdbeitingu, yfirráðasvæðum og eignarétti. Svona birtist pólitíkin víða. Ég hef því útnefnt sjálfan mig sem sáttasemjara ríkisins og hyggs skrá það í símaskrána á næstunni.

2002-11-14T23:53:00.000Z

Valdi, er það satt sem ég heyri?

Fólkið í húsinu mínu er að tala um að það sé eins og að vera í ökuskóla að fylgjast með þér á bílaplaninu. Mér skilst að þú sért heiðarlegasti ökumaðurinn á Görðunum. Þessi goðsögn um þig byggir á mjög tíðri stefnuljósanotkun þegar þú ert að þvæla um bílastæðið. Ég ætla að fara fylgjast með þér ;-)
Ég segi bara eins og Ísleifur í Mótorþáttunum á Skjá einum; ,,Þessi maður, Valdimar, hann notar stefnuljós, SEM ER GOTT."

2002-11-11T17:42:00.000Z

Halló aftur...

það getur verið ágætt að gleyma blogginu í nokkra daga. Ég hleyp hratt yfir sögu síðustu daga til að vinna upp bloggleysið;

-Það er fjör í skólanum. Krakkarnir geta verið svo ótrúlega skemmtileg en jafnframt ótrúlega yfirþyrmandi. Ég er ekki í rólegasta bekknum á Íslandi og það er alveg ágætt að vera búinn upp úr kl. 14. Annars gæti hausinn á mér átt á hættu að springa. Þau eru samt svo yndislega hreinskilin og það er svo gaman að fylgjast með pælingum þeirra og uppgötvunum.

-Strákurinn sem ég er með er ofurklár mongólíti. 8 ára snáði sem kann að lesa og reikna en nennir ekki að hlýða og er hinn mesti prakkari. Við erum góðir vinir þegar ég geri það sem hann vill en hann er fljótur að verða fúll út í mig þegar ég er að siða hann.

Einn vinur minn í skólanum (7 ára) kemur til mín í öllum frímínútum, tekur utan um mig og segist elska mig. Upphaflega elskaði hann mig þó á fölskum forsendum. Þá hefði Felix Bergsson verið að syngja í skólanum og þegar snáðinn spurði hvað ég héti, stuttu eftir að Felix söng, heyrðist honum ég segja Gunni. Hann hélt því að ég væri Gunni í barnastjarna sem var með Felix í Stundinni okkar.

-Helgin var góð. Full af fjöri, afslöppun og góðum félagsskap.

-Valdi Víðis klikkaði ekki. Kl. 22 á laugardagskvöldið kom SMS tilkynning um Lúdó og Steina á Þórskaffi. Synd að ég skyldi ekki fara. Valdi er með einn besta tónlistasmekk sem ég hef kynnst. Ég get skrifað upp á allt sem Valdi mælir með.

-Og síðast en ekki síst. Kjartan Sveinn er að stækka hratt og ég get ekki lýst gleði minni og stolti yfir syninum. Það er ótrúlega gaman að vera pabbi og maður sér lífið í allt öðru ljósi núna.

2002-10-31T15:11:00.000Z

Síðasti dagurinn hjá sambandinu...

...verð að drífa mig í kveðjupartýið á kaffistofunni.

2002-10-31T09:59:00.000Z

Framsóknarbyltingin

Ungir framsóknarmenn hafa látið til sín taka. Margir áttu bágt með að trúa hversu öflug við getum verið. Við höfðum sigur og nú getur framsóknarbyltingin hafist...

Við stefnum á að ná lögreglunni (hinum íslenska her) á okkar vald. Þegar það hefur tekist tökum við Stjórnarráðið, Alþingishúsið og Útvarpshúsið fyrir hádegi á byltingardaginn, sem ekki er gefinn upp strax. Framsóknarbyltingin mun samt byrja í Framsóknarhúsinu að Hverfisgötu. Þeir sem vilja vera með verða að skrá sig í flokkinn í dag. Daginn eftir byltinguna verður öllum 14 ára og eldri gert að skrá sig í vist í sveitum landsins í 3 mánuði á ári.

...nei,ok, slappiði af. Svona er þetta nú ekki hjá Framsókn. Við viljum bara að allir í skóginum séu vinir eins og við ;-)

2002-10-27T01:21:00.000Z

Föstudagskvöld

Sveeeeeeerir Bjöööööörnssssson...skoraði 8 mörk í stórsigri Þrumunnar á Árborgarliðinu. Mogginn segir að Sverrir hafi átt góðan leik og eins og Sjallarnir vita, þá lýgur mogginn ekki. Takk fyrir markið mitt Sverrir og til hamingju.

Spilað var í gær. Mættir voru Gvendurinn, Haukurinn, Elmarinn, Svanurinn og Kokkurinn. Atli rústaði Trivialinu. Síðan var farið í Famba og Atli átti einnig stórleik þar. Spilaðar voru 2 umferðir og Atli var eins nálgægt sigri í bæði skiptin og hægt var. Pressan kom hins vegar í veg fyrir að Atli næði að landa sigrinum og tókum við Eiki það að okkur. Þetta var hið besta mál og ég gef drengjunum 4 stjörnur fyrir skemmtunina. Tómas Frómas lendir hins vegar í skuld þar sem hann dumpaði okkur fyrir tveggja manna drykkjukeppni á Tjarnargötunni.

Ég var kominn heim um kl. 2 í nótt. Eftir það var lítill svefnfriður. Kjartan Sveinn kom sterkur inn á hliðarlínuna með lengstu nótt ever Grátur og gnýstan góma fram undir morgun. Eftir að ró komst á fjölskyldumeðlimi tók brunakerfið í húsinu við innan 2 tíma. Ég held að Atli hafi verið að kynda bál í stofunni sinni.

Mér tókst þrátt fyrir þetta að dreyma vondan draum. Ég og Buni vorum á upplásinni vörubílsslöngu að sigla um pollinn á Akureyri. Tommi og Elmar voru á hraðskreiðum hjólabát og svo voru einhverjir fleiri að dóla sér þarna. Buni ræðst í það að bjarga hálfsoknum kanó og á meðan byrja ég að sogast með geysi miklum straumi norður fyrir Eimskipsbryggju. Að lokum sé ég hvernig sjórinn sogast niður í hringiðju skammt frá mér. Ég byrja að róa gegn straumnum með höndunum en ekkert gengur. Ég fer að öskra á hjálp og Tommi og Elmar koma aðvífandi á hjálabátnum. Allri byrjuðu síðan að sogast nær og nær hringiðjunni og þegar allt virtist á beinustu leið til helvítis vakti minn elskulegi sonur mig með áværu öskri. Ég hef sjaldan verið eins ánægður með slíka vakningu.

2002-10-23T15:22:00.000Z

Einangrun

Nú er klukkan búin að vera 14:00 í svona klukkutíma. Ég bý að jafnaði við gríðarlega félagslega einangrun hér hjá sambandinu. Þegar ég er ekki í kaffi eða hádegismat sit ég einn á efstu hæð í frekar lítilli og kompulegri skrifstofu. Ég vinn algjörlega sjálfstætt og þarf sjaldan að ráðfæra mig við hið meinta samstarfsfólk. Það kemur því sífellt oftar fyrir að mér verður hugsað til þess hvernig standi á því að ég sitji hér launalaust að vinna vinnu sem hvílt hefur á starfsmönnum sambandsins í marga mánuði við félagslega mannskemmandi aðstæður? Það er gott að starfsnámið, eða öllu heldur sjálfboðaliðastarfið, fari bráðum að verða búið. Ef ég væri hér á loftinu mikið lengur færi ég að öðlast rétt á liðveislu frá Reykjavíkurborg til að rjúfa félagslega einangrun. Þá gæti einhverjir af vinum mínum sótt um að fara með mig í sund eða bíó tvisvar sinnum í viku.

2002-10-23T12:16:00.000Z

Tryggingar

Uppáhaldsfrænkunum, Hilmu og Ásu, verður tíðrætt um tryggingamál á bloggunum sínum. Ég tek undir með hverju orði sem þær segja. Maður verður að huga að tryggingamálunum sínum, ekki síst þegar maður er farinn að bera ábyrgð á fleirum en sjálfum sér. Ég geri ráð fyrir að sami tryggingasölumaður og talaði við Hilmu hafi komið til okkar GB í gær. Við erum núna með alls konar tilboð frá honum. Þetta er náttúrulega frumskógur sem ómögulegt er að henda reiður á. Hjalti, frv. tryggingasölumaður, sagði að það væri hægt að sannfæra mann um hvað sem er. Ég er samt ekki frá því að við verðum að sjúkdómstryggja okkur.

Á meðan sölumaðurinn sat með tilboðin sín frá Sjóvá-Almennum hringdi ég í tryggingafyrirtækið mitt VÍS. Ég sagði honum að sölumaðurinn væri hjá mér og þeir fóru þá að keppast við að sannfæra mig um að vera hjá sínu fyrirtæki. Það er svolítið erfitt að tala við einn mann í síma og með annan gjammandi við hliðina á sér, þar sem báðir eru að sannfæra mann um eitthvað sem maður er ekki alveg að skilja. Þetta var eiginlega bara fyndið. Ég skil ekki alveg hvernig fullorðnir menn nenna að stand í þessu. Ég lofaði Sjóvá-ekki neinu því ég ætla að tala aftur betur við VÍS. Maður verður nú að taka tillit til flokksins, ekki satt?

2002-10-22T08:45:00.000Z

Allt að gerast

Áður en ég vissi af var ég búinn að ráða mig í 75% vinnu í Lauganesskóla. Ég verð stuðningsfulltrúi í 1.-4. bekk og byrja að mæta alla virka daga frá 1. nóv. Mér stóð reyndar til boða að vera áfram hjá Sambandinu í 4 vikur, Nota Bene á launum, meðan ég kláraði verkefni sem ég þarf að gera. Það var hins vegar smá misskilningur með það svo nú er ég búinn að negla Lauganesskóla. Ég verð í vinnunni frá kl. 8:45 - 14:30. Ég stefni svo á að taka 7 einingar í HÍ eftir áramót og þá ætti allt að vera klárt nema 15 eininga lokaritgerð. Ég finn bara einhvern tíman góðan tíma fyrir hana, kannski í sumar. Mér lýst því bara vel á þessar breytingar.
Við GB erum að leita að góðri dagmömmu fyrir Kjartan Svein sem hann þarf að byrja hjá eftir áramótin. Þá getur GB rumpað lokaritgerðinni sinni af í janúar og febrúar og stefnt á að komast í vinnu í mars. Það er því allt að gerast þessa dagana. Ég vona bara að þessi dagmömmubransi gangi vel og að við finnum konu sem okkur lýst vel á.

2002-10-19T23:03:00.000Z

Ekkert í gangi

Ok ég er búinn að fatta mig. Það er miklu mun skárra að hafa of mikið að gera en ekki neitt. Ég hef aldrei átt auðvelt með að húka inni við ekki neitt. Guðrún Birna fór á kaffihús með Ásdísi, Kjartan Sveinn er sofnaður og hér er ég kl. 23:00 á laugardagskvöldi. Þetta á ekki við mig. Ég hef aldrei kunnað að horfa mikið á sjónvarp fyrir utan fréttir. Mér finnst reyndar ágæt að glápa með einhverjum öðrum á fyndna þætti eða góðar bíómyndir, en þá þarf ég líka alltaf að vera tala um leið. Þess vegna nenna margir ekki að horfa með mér. Síðan hef ég aldrei verið duglegur að lesa bækur. Það er eins með bækurnar og sjónvarpið. Mér finnst best að lesa þegar einhver annar er líka að lesa nálægt mér, t.d. GB. Þessi fötlun mín gerir það að verkum að ég rík oftast eitthvað út eða hringi út í bæ í félaga og fjölskyldu. Núna er hins vegar ekki við hæfi að hringja mikið. Því er ég bara hér núna u.þ.b. að snappa af aðgerðarleysi. Ég fór reyndar á heimasíðu HÍ og skoðaði heimasíður nemenda. Komst að því að húkrunarfræðinemar eru lélegastir í því að koma sér upp heimasíðum en viðskiptafræðinemar lang duglegastir. Það er gaman að þvæla svona á milli síðna og ég sá fullt af skemmtilegum myndum af fólki sem ég þekki.

Jæja, best að krossleggja fingurnar og vona að sunnudagsmogginn sé kominn í pósthólfið. Þegar ég var ungur maður í foreldrahúsum á Akureyri fannst mér fátt betra en koma seint heim á laugardagskvöldum, fá mér mjólk og kex eða kók og ost og sitja inni í eldhús með sunnudagsmoggann langt fram á nótt. Heyrumst,

2002-10-18T14:59:00.000Z

Föstudagseftirmiðdagur

Ferlega getur verið erfitt að nenna að gera eitthvað á föstudagseftirmiðdegi. Maður bíður bara eftir að komast í helgarfrí. Klukkan fer 3 skref áfram og 2 afturábak undir þessum kringumstæðum. Svakalega líður tíminn hægt. Skrítið þar sem í síðasta bloggi var ég að tala um hvað tíminn er takmarkaður. Maður er nú ekki alveg að meika sens hérna.

2002-10-17T23:55:00.000Z

Af bolti, málstofu og Samfélaginu

Var að koma úr bolta. Nú á ég örugglega eftir að liggja stjarfur upp í rúmi langt fram á nótt. Guðrún Birna þarf því ekki aðeins að berjast við svefnvenjur sonarins heldur þarf hún einnig að basla við að þagga niður í mér eftir bolta. Það er sko ekkert auðvelt að eiga svona stráka.

Elmar íþróttakennari var með mér í liði. Það eru verstu tímarnir. Hann rekur mann endalaust áfram og áður en langt um líður riðar maður eins og rolla milli veggjanna án þess að vita hvort maður er að koma eða fara. Maður er rétt að jafna sig viku seinna þegar næsti bolti byrjar. Nú naga ég agúrku og þamba vatn í stað þess að drekka kók og fá mér kex. Elmar segir að ég sé með fæðingarorlofsbumbu. Bumban má ekki verða stærri svo nú þýðir ekkert annað en passa hvað maður borðar.

Í hádeginu var ég í málstofu í skólanum. Síðan átti ég gagnlegan fund með Gunnari Helga kennara þar sem við tókumst á um misjöfn sjónarmið varðandi námið. Skildum þó sáttir að lokum.

Áður en ég fór í boltann var ég á aðalfundi Samfélagsins, félags framhaldsnema í félagsvísindadeild HÍ. Þar kynnti ég ársreikningana við mikinn fögnuð enda skiluðum við góðu búi. Ég gaf ekki kost á mér til áframhaldandi setu. Ég er alltaf að sjá hvað tíminn er hrikalega takmarkaður og maður verður bara að velja og hafna. Mér finnst ég ekki hafa nógan tíma fyrir fjölskylduna, vinina og sjálfan mig. Maður lifir þessu lífi bara einu sinni og verður því að passa sig á að hafa tíma fyrir það sem maður metur mest og er manni dýrmætast.

Best að fara þykjast sofa, góða nótt..zzzZZZZ

2002-10-16T09:09:00.000Z

Fyrsta hrímið

Mikið var kuldalegt að koma út í morgun. Ég hugsaði að það væri ekki gott að vera runni í dag. Ekki nema von að þeir hafi fellt laufin fyrir nokkru. Ég varð að byrja á að gramsa í geymslunni til að finna sköfu. Síðan fór miðstöðin og hitinn í afturrúðuna á fullt. Það versta er samt að bráðum verður að fjárfesta í vetrardekkjum. Hvernig á maður nú að fjármagna dekkin? 40 grönd hvorki meira né minna.

Mamma sagði mér skemmtilega sögu af afa Theodóri heitnum. Hann var með frægari refaskyttum á sínum tíma. Eitt árið skaut hann á 700 hundrað refi. Þá sagði hann við mömmu þegar hún var lítil: „Heldurðu að það verði fjör þegar þær koma allar til mín í himnaríki, litla vina?“ Afi var náttúrubarn út í fingurgóma, bjó í heiðarbýli við jökulsárgljúfur norðan undan Dettifossi, með silungavatn og svanasöng sér til lífsviðurværis. Blessuð sé minning hans.

2002-10-14T13:26:00.000Z

Aumingjabloggari bloggar

Á föstudagskvöldið var ég fenginn í „sérverkefni“ fyrir sambandið. Það var mjög lærdómríkt og mér leið eins og ég væri kominn inn í þáttinn „Spin City“ ef einhver kannast við hann. Segiekkimeir.

Síðan var ég á 9 manna norrænum fundi á laugardaginn. Það er helvítis að hlusta á skandinavisku í 5 tíma. Nu er jeg klukk i hedden og snakka bara dansk og da er ikke godt.

Sunnudagurinn leið hins vegar í spekt. Veggtennis með Styrmi klikkar aldrei og ísrúntur með frúnni á eftir ekki heldur. Svo er bara svo gaman að vera aðeins heima með Kjartani Sveini, mínum yndislega syni sem ég er svo óendanlega stoltur af. Hann gefur lífinu mínu svo mikið gildi og það er alltaf svo gaman að koma heim og hitta fjölskylduna sína eftir vinnu. :-)

Ég er svokallaður aumingjabloggari og veit af því. Ég þoli samt ekki þegar aðrir hóta að hætta blogga eins og hún Ása. Þetta er partur af programet að skoða bloggsíður og því jaðra svona hótanir við innrás í líf MITT. Ég var t.d. afar ánægður þegar Valdi byrjaði aftur að blogga. Ég treysti á ykkur folks.

2002-10-10T11:07:00.000Z

Nýir tenglar

Bætti við 3 nýjum tenglum. Ásu hans Sigga T, Valda kalda Víðis og Skátanum hennar Ásu. Vona að þetta skili sér á síðuna. Ef ekki verða viðkomandi aðilar að taka viljan fyrir verkið. Ég hef ekki verið duglegur að setja inn tengla en þetta er skref í rétta átt. Þekki ennþá marga sem eiga skilið að hafa tengla. Koma tímar, koma ráð...

2002-10-10T10:04:00.000Z

Dyggðasnauðir fantar

Það er ótrúlegt að nálægt því 40% Íslendinga kjósi þann málflutning sem Pétur Blöndal upphafði í þættinum, Ísland í dag, í gærkvöldi.

Í þáttinn voru mætt Jóhanna Sigurðardóttir (S) og Pétur Blöndal (D) til að ræða tillögu Jóhönnu, sem nú liggur fyrir Alþingi, um að afnema skattaálögur á fólk sem hefur undir 90.000.- kr. í laun á mánuði.

Það er í fyrsta lagi ótrúlegt að maður, sem getur velt sér upp úr peningum eins og Jóakim Aðalönd, vogi sér út í slíkar umræður.

Pétur var samt sem áður hinn æstasti í umræðunum og taldi að ríkið yrði af 1. milljarði kr. ef tillagan næði fram að ganga. Honum sveið það sárast ef þennan milljarð ætti að sækja til hinna ríku.

Samkvæmt skattframtölum ársins 2002 voru 4500 einstaklingar og fjölskyldur með rúm 21.2 milljarða króna í fjármagnstekjur þ.m.t. söluhagnað af hlutabréfum. Pétri fannst samt ekki svo slæmt að fjármagnstekjuskattur væri 10% vegna þess að það skilaði í raun enn meiri pening í ríkiskassann. Málflutningur Péturs snérist því ekki um að allir ættu að borga það sama eins og hann vildi láta líta út fyrir í upphafi.

Pétur sagði að það væri spurning um sjálfsvirðingu hvort fólk leitaði sér hjálpar hjá góðgerðasamtökum. Hvernig getur Pétur látið svona út úr sér? Er hann að segja að fólk sem ekki á fyrir mat og fötum hafi enga sjálfsvirðingu.

Þegar öllu er á botninn hvolft er þetta spurning um samfélagslegt menningarstig. Viljum við Íslendingar horfa upp á einstaklinga og fjölskyldur, sem lifa í okkar ríka samfélagi, lepja dauðan úr skel? Er ástæða til að skattpína fólk með 90 þúsund krónur á mánuði?

Já, það er mikið til í því sem skáldið sagði:

Það er dauði og djöfuls nauð,
er dyggðasnauðir fantar,
heimta auð með augun rauð,
en aðra brauðið vantar.

2002-10-07T16:42:00.000Z

Blessað bloggið!

Bloggið mitt á það til að leggjast í dvala. Það rumskar þó í dag í tilefni skrifa minna nú. Þannig er mál með vexti að fjölskyldan er að fara í sund. Kjartan Sveinn á nefnilega pantað í ungbarnasund kl 17:30. Sundlaugin er í sama húsi og Samband Ísl. sveitarfélaga svo ég get bara labbað á inniskónum í sundið. KS ætlar að vera langflottastur en afi og amma á Akureyri voru í borginni um helgina og gáfu honum rosa flotta Speedo sundskýlu með skálmum. Foreldrar hans eru samt svolítið stressuð að mæta í sundið en þau hafa aldrei öðlast frægði fyrir sundfimi. Það skýrist best þegar pabbinn reynir að stynga sér. Það er hending ef eitthvað verður eftir af vatni og fókli í laugunum eftir stungurnar hans. Maginn á mér verður líka álíka fallegur og rósabeð á eftir þegar roðinn eftir skellinn sprettur fram.

2002-09-06T14:13:00.000Z

Fyrsta vikan í starfsnámi

Þá er fyrstu vikunni í starfsnáminu hjá Sambandi íslenskra sveitarfélaga að ljúka. Þetta stefnir í að vera ágætis mál en hver getur samt verið sáttur við að vinna á fullu án launa? Ég ætla að gera mig ómissandi í næstu viku og í vikunni þar á eftir ætla ég að banka upp á hjá framkvæmdastjóranum og athuga hvort ég geti ekki kreysta einhverja aura út úr honum. Ég er aðalega búinn að vera skoða styrkjakerfi ESB síðustu daga en einnig verið að vinna á bunkanum á skrifborði leiðbeinanda míns, er varða ráðstefnur og fyrirlestra. Hér eru margir hressir starfsmenn sem gaman er að spjalla við og svo fær maður líka að hitta fræga menn eins og bæjarstjórann á Akureyri, Kristján Þór Júlíusson og formann Sambands sveitarfélaganna Vilhjálm Þ. Vilhjálmsson. Besta við þetta allt saman er samt hið endalausa kaffi. Hér get ég drukkið eins mikið kaffi og ég get í mig látið. Eins og ég hef lært að segja; Kaffi er heimsins laun.

2002-08-26T00:53:00.000Z

Á leið í bústað

Við, litla fjölskyldan, ætlum að skella okkur í bústað í Munaðarnesi í Borgarfirði síðustu vikuna í ágúst. Þetta er síðasta vikan okkar saman áður en ég fer í starfsnámið mitt sem byrjar 2. sept. Það verður rosalega gott að fara út úr borginni og upp í sveit þar sem engin tölva er að freista manns. Mamma og pabbi gista sennilega hjá okkur einhverjar nætur á leið sinni frá Prag norður til Akureyrar. Vonandi kíkja svo tengdó líka eitthvert kvöldið. Ég hlakka svooo til að njóta sveitasælunnar, fara í sund, golf, göngutúr, grilla, lesa, sofa og fara í pönnukökur til Þóru formanns. Bless á meðan.

2002-08-19T23:53:00.000Z

Útskriftarárgangur MA 98

Útskriftarárgangurinn í MA frá því vorið 1998 er kominn með heimasíðu. Tilefni þessa framtakssama verkefnis er að næst sumar, eða nánar tiltekið þann 17. júní, verða liðin 5 ár frá útrskrift. Forkólfar heimasíðunnar eru þau Dagný Reykjalín og Tryggvi Rúnar Jónsson og fyrir það eiga þau lof skilið.

Slóðin er; http://www.ma98.net/

2002-08-13T13:37:00.000Z

Skömm í hattinn

Ása hans Sigga T skammar mig á blogginu sínu fyrir að hafa ekki link á hana og fleira gott blogg fólk. Hún segir að það sé ljótt að skilja út undan. Rétt er það en ég hef alltaf litið svo á að tenging mín við bloggheiminn sé í gegnum Guðrúnu Birnu en þar eru linkar út á hið víðfeðma ólguhaf bloggheimsins. Sennilega verð ég nú samt að setja fleiri linka, þ.á.m. Ásu svo ég sé ekki félagsskítur. Ég ætla nú samt að taka mér einhverja daga í það. Þangað til er GB tenging mín við ykkur hin ;-)

2002-08-13T13:11:00.000Z

25 ár síðan Elvis lést

Á föstudaginn, 16. ágúst, eru liðin 25 ár síðan rokkstyrnið Elvis Presley lést. Ég hélt mikið upp á Elvis þegar ég var yngri og mér þykkir alltaf gaman að heyra gamla slagara með karlinum. Það væri því vel við hæfi að setja nokkra af gömlu diskunum í græjurnar á föstudaginn og stæla þann gamla með luftgitarnum.
Ég hef líka gaman af því að hafa náð Elvis á lífi. Þar sem ég er fæddur 19. júlí 1977 eða rétt tæpum mánuði áður en Elvis kvaddi. Þegar ég verð orðinn elsti Íslendingurinn eftir um 85 ár, þá verður farið að rifja upp í fréttatímunum hvað ég hef lifað og þá verður m.a. sagt; ,,Elvis Presley var enn á lífi þegar Guðmundur kom í heiminn."

Munið svo þetta; Í Bandaríkjunum hafa verið 53 forsetar, en aðeins 1 kóngur.

2002-08-12T16:32:00.000Z

Diblad nebb

Ég náði mér í þessa hálsbólgu og kvef sem er að ganga. Ótrúlega fúlt að vera svona. Hef samt fulla trú á að ég komist yfir þetta með lágmarksleiðindum. Er bara duglegur að briðja C-vítamín og drekka heitt kakó, kaffi og te. Skrítið hvað maður er alltaf verstur á kvöldin og nóttunni en svo verður maður skárri á daginn. En nú er dagur svo ég er glaður en í kvöld verð ég stúrinn fyrir lúrinn því þá verður flensan aftur við völd.

2002-08-09T20:32:00.000Z

Morgunstund með Gumma

Greinin mín á Maddömunni, um stjórnmálasafn á Íslandi, hefur fengið góða viðtökur. Svo góðar viðtökur að nú hefur Sveinn, dagskárgerðarmaður á Rás 2, haft samband við mig og beðið mig að koma í morgunþátt sinn í fyrramálið, laugardagsmorgun. Sem sagt, ef þið vaknið upp í slæmri þynku í fyrramálið, prófið þá að stilla á Rás 2 (eftir kl. 10:30) og athugið hvort ykkur líði ekki betur við að hlýða á mig röfla um nauðsyn þess að koma á laggirnar stjórnmálasögusafni á Íslandi.
ES ég lofa ekki skjótum bata ;-)

2002-08-08T16:45:00.000Z

Kosningar í Heimdalli

Á morgun fara fram kostningar til stjórnar Heimdalls, félags ungra Sjálfstæðismanna í Reykjavík. Þeir sem hafa sýnt þeim einhvern áhuga ættu að vita að þar er mikil barátta að fara eiga sér stað, enda hefur Sjálfstæðisflokkurinn verið klofinn eftir áherslum, öfgum og mönnum í áratugi. Þeim sem eitthvað fylgjast með vita líka að síðastliðin ár hefur Heimdallur verið öfgasinnaður hægri armur innan Sjálfstæðisflokksins sem virðir engin manngildi og góðar hugsjónir. Heimdallur hefur t.d. verið þekktur fyrir að vilja leyfa neyslu eiturlyfja og rústa velferðarkerfinu með skattaafnámi.

Þórlindur mágur minn býður sig nú fram til forystu í Heimdalli. Ég veit að hann hefur betri og hófsamari skoðanir en þau öfl sem nú ráða ríkjum og sækjast eftir endurkjöri, enda er Þórlindur traustur, heiðarlegur og góður maður og mannvinur hinn mesti. Við þá sem eiga skírteini í Heimdall skora ég nú á að fara og kjósa Þórlind á morgun og bola um leið hinum samvisku- og dyggðasnauða armi í Sjálfstæðisflokknum í burtu. (ég vil helst ekki sjá þessa litlu Hannesa í íslenskum stjórnmálum.)

Gangi þér vel á morgun mágur sæll :-)

2002-08-08T13:35:00.000Z

Nýr skoðanavettvangur

Nú hef ég fengið tækifæri til að segja skoðanir mínar á vefriti ungra miðjumanna, maddömunni. Fyrsta greinin hefur litið dagsins ljós. Endilega kíkið. (Greinarnar eru merktar með upphafsstöfum höfunda)

2002-08-06T23:56:00.000Z

Haldið burt frá eldi

Mér til mikillar furðu hef ég tekið eftir því að á ótrúlega mörgum fötum sem Kjartan Sveinn klæðist, stendur á þvottamiðanum, rauðum og stórum stöfum; "KEEP AWAY FROM FIRE". Er þetta eitthvað spaug hjá framleiðendunum? Væri ekki einfaldara að segja bara; "KEEP AWAY FROM BAD PARENTS."

2002-08-06T16:14:00.000Z

36 holur í gær
Gærdagurinn var sannkallaður ,,golfdagur". Ég fór fyrst 18 holur með Styrmi og Gulla, þar sem helst bar til tíðinda að Gulla tókst, sökum úrhellis, að missa kilfuna í upphafsskoti svo hún klauf vindinn með látum næstu 30 metra við mikla aðdáun okkar Styrmis. Um kvöldið tók ég svo aðrar 18 holur með þeim Marinó og Sverri. Þar bar helst til tíðinda góður árangur Sverris sem aðeins hafði eina kilfu, fimmuna, meðferðis. (Hann stalst þó nokkrum sinnum í pokana okkar).

Þegar heim var haldið datt Sverri í hug hvort nýji, dýri, fíni bíllinn hans Marinós væri ekki örugglega með SPUNK bremsukerfi. (Allir vita að slíkt er ekki til). Við spiluðum svo úr þessu saman næstu 20 mínoturnar, eða allt þar til við Sverrir sprungum úr hlátri. Á meðan bremsaði Marinó þvers og kruss alla Heiðmörkina í von um að verða var við SPUNK eiginleikana og heyra pípið sem því átti að fylgja ;-)

2002-08-04T16:15:00.000Z

Sveppi og ég á eigin hátíð

Föstudagskvöld um verslunarmannahelgi... Við Sverrir Björnsson, æskuvinur minn, settum upp löngu tímabæra hátíð þegar við fórum 2 saman niður í bæ og þræddum hálftóm kaffihúsin. Þetta var alveg fullkomin stemmning fyrir mig þar sem fælni mín við miðbæinn í Reykjavík og fylliríið þar hefur stigmagnast síðustu misseri. Þarna var ég semsagt í góðum félagskap trausts vinar, sem lofaði að gæta mín ef einhver vildi berja mig í hausinn með flösku. (Hef þegar fengið dæmdar skaðabætur í héraðsdómi vegna slíks atviks.)
Við ræddum um allt sem ungir menn ræða um. Það er afar gott að geta rætt svona saman og Sverrir er þannig karakter að hann getur talað um hvað sem er og hefur alltaf skemmtilega sýn á hlutina sem gott er að heyra. Það eru nefnilega fáir sem pæla eins mikið og Sverrir í alls konar hlutum. Ein af fyrirmyndum hans er Martin Lúter King, sem segir kannski nokkuð um skoðanir hans.

Sverrir hefur líka mikinn áhuga á uppvexti og þroska Kjartans Sveins. Reyndar sér maður alveg nýjar hliðar á vinum og ættingjum við tilkomu erfingjans. Menn hafa eðlilega mismikinn áhuga á hinum nýja fjölskyldumeðlim en það er víst að maður kann virkilega vel að meta þann áhuga sem margir góðir vinir okkar sýna drengnum. Svo eru aðrir sem virðast frekar forðast barnafjölskylduna hver svo sem skýringin á því er. Ég vil því nota tækifærið og þakka öllum góðu vinum okkar og fjölskyldum þann stuðning og áhuga sem þau hafa sýnt okkur :-)

2002-08-02T17:34:00.000Z

Verslunarmannahelgin í aðsigi
Nú fer verslunarmannahelgin (alltaf kölluð ,,versló" fyrir norðan en gengur ekki fyrir sunnan vegna Verzlunarskólans) að hefjast. Maður finnur hvernig samfélagið spennist upp þegar á líður vikunna og vinnandi fólk smám saman hættir að hugsa um vinnuna. Fólk bíður í óþreyu eftir að sleppa út á föstudagseftirmiðdag, (sem er núna í þessum skifuðu orðum).
Það er á þessari stundu sem mér verður orðavant við að lýsa ánægju minni með að vera í afslöppun hér heima með fjölskyldunni minni. Það er nefnilega svo ótrúlega leiðinlegt að komast út úr borginni þegar allt er stíflað.
Ég vil samt ekki gera lítið úr því að þegar allir eru komnir á sinn stað er get ég víða hugsað mér að vera en þó hvergi eins mikið og á þjóðhátið í Vestmannaeyjum. Þangað fór ég í fyrra og þangað langar mig aftur. Fyrir mér er hátíðin eins og úr frummyndaheimi Platons. Þar er fólk á öllum aldri saman komið til að skemmta sér í einstöku umhverfi, þar er varðeldur, flugeldasýning, brekkusöngur og allt...

Verslunarmannahelgin er merkilegur atburður og flestir nýta hana til að gera sér eitthvað til gamans. Það er auðvitað misjafnt sem mennirnir leita að en mikilvægast er að fólk beri virðingu hvort fyrir öðru og hagi sér samkvæmt því.
Ég óska landsmönnum öllum góðrar skemmtunar um helgina og vona svo sannarlega að helgin verði stóráfallalaus.

2002-08-01T00:54:00.000Z

Feðgar slá þyngdarmet
Kjartan Sveinn fór í 6 vikna skoðun á heilsugæslustöðina á Seltjarnarnesi í gær, þriðjudaginn 30 júní. Vegur hann nú 5380 gr. og er orðinn 58 cm. á hæð. Það samsvarar þyngdaraukningu upp á rúm 200 gr. á viku og 1 cm. lengdaraukningu. Kappinn er því óðum að vaxa úr grasi og stolt föðursins er að verða óþolandi fyrir nærstadda. Reyndar sló hann sjálfur eigið þyndarmet á heilsugæsluvigtinni en það er nú ekkert til að vera stoltur af. Svona er það víst oft þegar maður verður hálf-fimmtugur.
Kjartan Sveinn er farinn að hlægja og hjala við hvern sinn fingur. Oftar en ekki skríkir hann af gleði þegar gamli maðurinn sprangar upp úr rúminu á morgnanna. Þá finnst okkur öllum sko gaman að lifa...

2002-08-01T00:39:00.000Z

Norðurlandsferð

Þá er búið að fara með frumburðinn í menningarreisu norður í land. Kjartan Sveinn kunni vel við sig á Akureyri en einnig skoðaði hann sig um á Húsavík og í Mývatnssveit. Það var rosalega fínt að kíkja norður og alveg er það einstakt hvað Akureyri er mikill snildar staður. Þar er allt til alls og engar umferðarteppur eða langar vegalengdir sem stytta óhóflega þann tíma sem maður hefur til að njóta þess sem maður leitar að. Auk þess kemst maður í friðhelgi náttúrunnar án mikillar fyrirhafnar ólíkt því sem suðvesturhornið hefur að bjóða. Oseisei og jájá.

2002-07-12T20:26:00.000Z

Það er ,,pláss laust" á Þórshafnahátið
Í þessum töluðu orðum er norðan maðurinn, ofurkommúnistinn, systursonur Steingríms J. og ferðamálafrömuður norð-austurlands, Sigfús Ólafsson að kynna ferðamannahátíð á Þórshöfn. Skoraði hann þar á landsmenn að leggja land undir fót með þeim orðum að það væri ,,pláss laust" á Þórshöfn. Í sjónvarpinu kom þetta hins vegar út sem svo að á Þórshöfn væri ,,plásslaust", sennilega með öllu og því varla von að nokkur maður eyði tíma sínum í að keyra austur.

Þarna hefði farið betur á að segja að það væri nóg ,,laust pláss" fyrir ferðafólk á Þórshöfn, Sigfús minn.

2002-07-12T19:57:00.000Z

Nýr vettvangur fyrir stjórnmálafræðinga
Svo virðist sem nýr vettvangur hafi skapast fyrir stjórnmálafræðinga. Að undanförnu hafa 2 nýjir íþróttafréttamenn litið sviðssljósið á ríkissjónvarpinu en það eru þeir Hlynur Sigurðsson og Baldvin Þór Bergsson (eða Baldur eins og Elín Hirst kaus að kalla hann). Þeir eiga það sameiginlegt að vera góðir félagar mínir úr stjórnmálafræðináminu í HÍ. Áður hafði annar félagi okkar, Einar Örn Jónsson, handboltakappi með meiru, fetað þessa sömu slóð. Til að renna enn frekari stoðum undir framreið stjórnmálafræðinema í íþróttafréttamennskunni má minna á að Logi Bergman sagði á sínum tíma íþróttafréttir. Þá hafa Haraldur Daði og Þór Bæring fengist við íþróttalýsingar á FM 95,7 og að lokum hefur vinkona mín, hún Birna Ósk Hansdóttir fréttakona á stöð 2 og konan hans Einars Arnar einnig tekið að sér að segja frá helstu íþóttaviðburðum.

Hér má því með sanni segja að nýr vettvangur sé kominn fyrir núverandi og fyrrverandi stjórnmálafræðinema og spurning hvort þarna leynist ekki einmitt tækifæri á að sækja um lögverndun á starfsheitið og stofna stéttarfélag, okkur öllum til hagsbótar.

Krakkar, ég er stoltur af ykkur.

2002-07-12T00:25:00.000Z

Jafnréttisfulltrúi brýtur jafnréttislög

Valgerður Bjarnadóttir, efsti maður á lista VG á Akureyri í bæjarstjórnarkostningunum í vor, jafnréttisfulltrúi Akureyrarbæjar og formaður Leikfélags Akureyrar var dæmd í dag fyrir að hafa brotið jafnréttislög þegar hún réð karlmann í starf leikhússtjóra LA í stað mun menntaðri konu sem sóttist eftir starfinu. Í sjónvarpsviðtali í kvöld hló hún hins vegar að spurningu um hvort hún myndi víkja sæti sem jafnréttisfulltrúi og taldi dóminn afar hæpinn. Hér held ég að komið sé mesta hneyksli af opinberum vettvangi síðan Árni Johnsen hellulagði garðinn sinn með Þjóðleikhúshellunum og svo videre.

Það er alltaf sorglegt þegar fólk í opinberum stöðum neitar að viðurkenna mistök sín, virðir ekki dómstólana og heldur áfram að berja hausnum við stein. Þetta mál hennar Valgerðar er alveg einstaklega kaldhæðnislegt og óþægilegt fyrir hana. Kona sem starfar við það að standa vörð um jafnrétti en brýtur lögin sem starf hennar byggist á er alls ekki trúverðugur starfsmaður. Dómurinn þýddi því í raun að Valgerður væri ekki starfi sínu vaxin.

SORRY Valgerður, þú klúðraðir þessu.

2002-07-10T23:19:00.000Z

KA best

Í skoðanakönnun sem nú er í gangi á íþróttavef Morgunblaðsins hafa 62% þátttakenda kosið KA sem það lið sem hefur komið mest á óvart í fótboltanum í sumar. Næst á eftir kemur KR með um 24% atkvæða. KA menn eru nýliðar í deildinni og með nær óbreytt lið frá því í 1. deildinni í fyrra. Þrátt fyrir það sitja þeir nú í 2-3 sæti með 15 stig, 2 stigum á eftir efsta liðinu, þegar öll liðin hafa spilað saman. Nú verður spennandi að fylgjast með seinni hlutanum og mikið hef ég nú gaman af að sjá gamla liðið mitt að norðan stinga svona upp í hrokaliðin hér fyrir sunnan sem spáðu KA mönnum nánast falli í upphafi sumars. Það skal tekið fram að ég held alltaf með landsbyggðarliðunum í slíkum keppnum og nú vona ég bara að ÍBV og Þór fari að komast á skrið og haldi sér að minnsta kosti uppi í deildinni.

Því fleiri lið af landsbyggðinni í efstu deild, því meiri líkur eru á að settur verði upp jöfnunarsjóður fyrir ferðakostanað liðanna. Liðin eru nefnilega langt frá því að vera í sömu stöðu í deildinni þegar nokkur lið þurfa að eyða margföldum fjármunum í ferðir á við önnur lið sem eru á höfuðborgarsvæðinu. Höfðuborgarliðin geta þannig eytt margfallt meiri fjármunum í leikmannakaup og aðstöðu. Ég man þá tíð þegar KA, Þór, Leiftur og ÍBV voru öll í 1. deild. Þá grétu sunnan menn úr sér augun yfir ferðakostnaði. Ef keppnin á að vera sanngjörn, þá verður að jafna stöðu liðana hvað þetta varðar.
ÁFRAM KA...

2002-07-07T15:55:00.000Z

Kaffiþjóð!
Ef Halldór Laxness speglar íslenskt bændasamfélag fyrr á tímum með réttmætum hætti í Sjálfstæðu fólki, sem ég efast ekki um að hann geri, þá spilaði kaffi ótrúlega stóra rullu í þjóðlífi landans. Ef rétt er, þá er mér til efs að kennslubækur um íslenska sögu endurspegli nægjanlega vel löngun og þörf kotbænda í kaffi. Svo virðist sem virðing og sjálfsmynd manna hafi byggst á því hvort þeir gætu boðið gestum sínum kaffi og þá hversu sterkt þeir gátu helt upp á. En hvað olli þessari kaffiþráhyggju afskekktra eyjarskeggja í Norður-Atlantshafi? Þeirri spurningu verður ekki svarað hér.

Hitt get ég þó fullyrt að öllu góðu fólki er velkomið að líta í kot minnar fjölskyldu því við getum með stolti boðið upp á sterkt kaffi fyrir alla sem vilja þiggja, þó sennilega verði ekki brennivíni helt út í það. Hér búa nefnilega hvorki sýslumenn né prestar.

2002-07-06T22:17:00.000Z

Sonurinn hefur fengið heimasíðu
Kíkið á heimasíðuna og endilega skrifið í gestabókina: http://www.barnaland.is/barn/6884/

2002-06-19T12:10:00.000Z

Okkur er fæddur lítill prins!
Pósturinn sem ég sendi félögunum, segir það sem segja þarf á þessari stundu:

,,Sælir félagar og innilegar þakkir fyrir allar kveðjurnar!
Það er mjög gaman að fá smá SMS á svona stundu og vita að það er fylgst með manni. Annars er engin þörf á frekari fullvissu um það því það er nóg stress fyrir nýbakaða foreldra að læra á allt sem því fylgir. Ég hef því ekkert verið að stressa mig á símanum, hef hann á "silent" og lít á "missed call" sem "kærar kveðjur". Ég hef svo bara samband þegar allt fer að komast á rétt ról.
Nú er sonurinn orðinn u.þ.b. 31 stunda gamall, fæddist 8 mín í 5 í gærnótt. Við vorum að skríða heim og það er rosalega gott. Við erum öll dálítið þreytt og þau mæðginin lögðust strax upp í rúm og sofa núna vært. Ég veit ekki alveg hvað skilaði sér af upplýsingum til ykkar allra en það var sko ekkert grín að vera á skiptiborðinu fyrir alla familyuna mína og hennar, með öllu hinu. Svo hér kemur þetta:
Fæðingin er einstök upplifun og best að þið komist bara að henni sjálfir. Ég get samt sagt að ef konan myndi eyða sömu kröftum í t.d. að lyfta hlutum, þá gæti hún örugglega velt til nokkrum bílum af stærri gerðinni. Þetta voru því mikil átök en Guðrún Birna stóð sig ótrúlega vel bæði andlega og líkamlega og sýndi gríðarlegan styrk á báðum sviðum. Mér finnst ég hafa kynnst henni á nýjan hátt eftir þetta allt saman og ég veit að ég á núna 2 sannar hetjur.
Við vorum bara búin að sofa einn og einn hálftíma hér og þar síðustu tvo sólahringana fyrir fæðinguna og síðasta sólahringin höfum við verið svo upptekin af barninu að það hefur frekar lítið verið sofið síðan. Það er samt rosalega gott að vera kominn heim og Guðrúnu Birnu líður betur hér heldur en á sjúkrahúsinu. Hún er reyndar mjög hress miðað við hvað stutt er síðan sonurinn fæddist.
Drengurinn er sem sagt 16, 5 merkur og 52 cm. Hann er því dálítill bolti og hraustur eftir því.Hann bregst vel við öllu áreyti og spriklar og grætur hátt eftir þörfum. Guðrún Birna segir að hann sé með nefið mitt (ég er samt ennþá með það) og hökuna. Hún segist samt eiga eyrun en annars er hann bara dálítið líkur sjálfum sér eins og sagt er. Hann er nokkuð "ákveðinn" á svipinn. Hann er með stutt, ljóst hár en annars sjáið þið hann bara þegar vel stendur á. Vonandi get ég svo sett inn myndir af honum á netið á næstunni. Ætli ég sendi þá ekki bara til ykkar eina slíka í tölvupóstinum.

Ég held ég láti þetta duga í bili (ætla að fara háma í mig mat) og þakka aftur fyrir allar kveðjurnar,

Kærar kveðjur
Guðmundur Freyr, Guðrún Birna og óskírður Guðmundsson :-)"

2002-06-14T21:46:00.000Z

Dabbi kóngur orðinn gaga!

Ég held að hann Davíð Oddson sé nú bara að verða eitthvað klikkaður. Ég held að hann þjáist af vænisýki og sjálfshverfu. Það er alla vega mín sálgreining á honum, eftir að hann greindi mig sem mann sem heldur að viti allt betur en aðrir, sé fallegri og betri en aðrir og vilji hafa vit fyrir öllum. Hann taldi mig einnig vera áskrifanda af öllum mótmælalistum sem gengu á landinu. Reyndar sálgreindi Davíð tugi þjóðþekktra manna úr öllum stjórnmálaflokkum (líka fylgisveina sína) með sama hætti og mig.

Þeir sem vilja kynna sér nánar hverjir þeir eru er bent á auglýsingu í Morgunblaðinu, fimmtudaginn 13. júní. bls. 19.

Orðsending til Davíðs; Kæri Davíð, ef þú berð ekki virðingu fyrir skoðunum almennings í landinu, þá er út um þig sem forsetisráðherra landsins.

Kær kveðja til Davíðs með von um skjótan bata.

2002-06-11T15:15:00.000Z

Sýn indaHouse!
Karlinn er kominn með sýn :-) Ég er búinn að eiga í harðvítugu strögli við sjálfan mig frá upphafi HM, þar sem ég hef reynt að sannfæra mig um að ég geti alveg horft á boltann ruglaðan og látið hljóðið nægja. Mín ástkæra kona hefur hins vegar, ólíkt flestum íslenskum heitmeyjum, hvat mig til að láta eftir lystisemdum knattspyrnunar og splæsa á mig áskrift að Sýn. Þegar hún spurði mig svo, núna fyrir um hálf tíma síðan, hversu fljótt ég teldi þessa fjármuni fara á skemmtanalífinu (sem ég hef löngu gefist upp á), náði ég ekki að svara, því ég var þotinn upp í Skífu. Nú er ég kominn aftur heim með afruglarann og líður eins og mér hafi verið sleppt úr andlegu fangelsi. Ef ég svara ekki símanum næstu daga er ég annað hvort að horfa á boltann eða kominn upp á fæðingardeild.
Áfram Danmörk...

2002-06-08T16:54:00.000Z

Eiríkur Svanson er tölvunarfræðingur
Til hamingju með útskriftina Eiríkur minn. (Eiríkur er fornvinur minn og afar vænn drengur. Hann er að útskrifast frá HR í dag.)